Xitayning 2017-yili ürümchi 5-türmide 1500 Uyghurni biraqla sotlan'ghanliqi ilgiri sürüldi

Muxbirimiz erkin
2020-04-13
Share

Xitay hökümitining 2017-yili 6-ayda Uyghur diyarining bir kentidiki barliq Uyghurlarni tutqun qilip, bu kentning erkeklirini ürümchi 5-türmide biraq sotlighanliqi ilgiri sürüldi.

Bu xewerni "Mayak" namliq bir tor agéntliqi 13-aprél twittérda élan qilghan. Xewerde bu uchurni öz waqtida Uyghur rayonigha "Yardem" ge barghan bir xitay kadirining "Mayak" agéntliqigha ashkarilighanliqi tekitlen'gen.

Bu xitay kadirining ilgiri sürüshiche, 2017-yili 6-ayning 17-küni etigen tang seherde toluq qorallan'ghan xitay saqchiliri Uyghur diyarining bir kentidin tutup kélin'gen 1500 neper Uyghur mehbusni ürümchi 5-türmige élip kelgen.

Bu xitay kadiri tutqunlarning 25 aptobusqa bésip élip kélin'genliki, ularni 5-türmide 150 neper qoralliq alahide saqchi, 200 neper saqchi xadimi, türmidiki 300 neper jinayetchi kütüwalghanliqini bildürgen. Lékin bu xitay kadiri tutqunlarning qaysi kentlik ikenlikini tilgha almighan. U xitay azadliq armiyesining 2000 neper eskirining bu kenttiki pütün ahalini tutqun qilip, erkeklirining 5-türmige élip kélin'genliki, bashqa a'ile ezalirining mekteplerge qamilip, waqitliq tekshürüshke élin'ghanliqini ilgiri sürgen.

Uning tekitlishiche, tutqunda qéchishqa urun'ghan 5 neper kent puqrasi öltürülgen shundaqla bezi tutqunlar 28 sa'et dawamlashqan seperde ölgen. U tutqunlarning 30 pirsentining 60 yashtin yuqiri ikenliki, ularning 5 yildin 10 yilghiche késilgenliki, 10 yildin artuq késilgenlerning bashqa jaygha élip kétilgenliki, ularning adwokat teklip qilishi yaki erz qilishigha yol qoyulmighanliqini bildürgen.

Közetküchilerning ilgiri sürüshiche, bu uchur Uyghur rayonida shu mezgillerdiki chong tutqunda yüz bergen hadisilerge mas kélidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet