“қәшқәр конашәһәр һөҗҗәтлири” дә тутқундики миңлиған уйғурниң тизимлики ашкариланған

Мухбиримиз әркин
2022.05.13
Share on WhatsApp
Share on WhatsApp

Чәт әл таратқулири елан қилған “қәшқәр конашәһәр һөҗҗәтлири” дә хитай һөкүмити тәрипидин тутқун қилинип кесиветилгән 10 миңдин артуқ уйғурниң тизимлики ашкариланған. Франсийә агентлиқи тәрипидин елан қилинған бу һөҗҗәт буниңдин хели бурун ашкариланған болсиму, лекин һөҗҗәттики тутқунларниң салаһийитини дәлилләшкә нәччә ай вақит кәткән. Мәлум болушичә, “қәшқәр кона шәһәр һөҗҗәтлири” хитайниң “қарақараш һөҗҗәтлири” дин кейин ашкарланған йәнә бир муһим мәхпий һөҗҗити һесаблинидикән.

Бу һөҗҗәт қәшқәрниң кона шәһәр наһийәсидин тутқун қилинған уйғурларниң тизимлики болуп, униңда тутқун қилинған 10 миңдин артуқ уйғурниң тутқун қилиниш сәвәби, қамақлиқ орни қатарлиқларға даир учурлар баян қилинған. Чәт әл таратқулириниң хәвәр қилишичә, чәт әлдики нурғун уйғурлар өзлириниң 2017-йилдин бери ғайип болған аилә әзалири, уруқ-туғқанлири, дост-ярәнлири вә юртдашлириниң ақивитини бу һөҗҗәттин билгән. Радийомизниң мухбири нуриман абдурешитниң ата-аниси билән икки әркәк қериндишиниң 2017-йилдин кейин тутқун қилинип, кесиветилгәнлики мәлум болған болсиму, бирақ уларниң ақивитидин һазирға қәдәр хәвәр болмиған иди.

Франсийә агентлиқиниң билдүрүшичә, нуриманниң түркийәдики сиңлиси нурсиман абдурешит бу һөҗҗәттин мәмәтили исимлик бир инисиниң 15 йил 11 айлиқ кесилип, ақсу шәһириниң сиртидики бир түрмигә қамалғанлиқини билгән.

Униң франсийә агентлиқиға билдүрүшичә, у “қәшқәр конашәһәр һөҗҗәтлири” дин өзлириниң кәнтидинла тутқун қилинип кесиветилгән 100 дин артуқ кишини тонуған. У йәнә һөҗҗәтики исимләрдин өзлири турушлуқ йезидики башқа йәттә кәнттә олтурушлуқ кишиләрни тонуғанлиқи, уларниң һәммисиниң “терорлуқ” билән һечқандақ алақиси йоқ кичик тиҗарәтчиләр вә ишләмчиләр икәнликини ейтқан. Көзәткүчиләрниң ейтишичә, бу һөҗҗәт хитайниң уйғурларға ирқий қирғинчилиқ қилғанлиқини йәниму илгирлигән һалда испатлайдиған муһим бир дәлил икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.