Уйғур учқучи капитан әкбәр мәмәт хаңҗуда сақчилар тәрипидин тәкшүрүлди

Мухбиримиз меһрибан
2016-01-26
Share

Өткән һәптә аммиви таратқуларда хитай җәнубий җуңго авиатсийә баш ширкити шинҗаң тармақ ширкитиниң уйғур учқучиси капитан әкбәр мәмәтниң үрүмчи хаңҗу учуш сәпиридә хаңҗу сақчилири тәрипидин елип кетилип, сақчиханида җинайәтчи муамилисидә қаттиқ тәкшүрүшкә учриғанлиқи һәққидики учур тарқилип муназирә қозғиди.

Учқучи әкбәр мәмәт 23-январ күни үндидар ториға йоллиған учурида, йеқинқи бирқанчә йилдин буян хитайниң ичкири өлкилиридә елип бериливатқан уйғурлар үстидики қопал тәкшүрүшкә наразилиқини билдүрүп мундақ язиду: "23 йил бихәтәр учушни тамамлиған бир учқучи болуш сүпитим билән, өзүмни хизмитимгә садиқ, кәсиптә пишқан, қанунға риайә қилидиған, рәһбәрлик вә хизмәтдашлиримниң һөрмитигә еришкән бири дәп биләттим. Лекин йеқинқи бирқанчә йилдин буян һәр қетим ички өлкиләргә учуш сәпиримдә сақчилар келип кимликимни тәкшүридиған, чүшиниксиз соалларни сорайдиған қисмәтләргә йолуқуп кәлдим, гәрчә бу ишлардин интайин биарам болсамму, лекин йәнила уларниң тәкшүрүшигә маслишип кәлдим. Болупму 2016-йил 1-айниң 21-күни меһманханиға орунлишип 10 минут болмай, 3 нәпәр хаңҗу сақчиси тәрипидин нәрсә керәклирим ахтурулуп, тәкшүрүлгәндин кейин, сақчи аптомобили билән сақчиханиға елип берилип, кинолардикидәк тамға йөләп турғузулуп, сүрәткә тартилиш, бармақ изимни елиш, д н а тәкшүрүши қатарлиқ қопал муамилигә йолуқушум, маңа өзүмни җинайәткардәк һес қилдурди! хорлуқ туйғуси һес қилдурди. Мән уларниң башлиқини издәп тепип наразилиқимни ипадилидим. Идарә рәһбәрлиригиму әһвални инкас қилдим. Гәрчә кейин улар мәндин кәчүрүм сориған болсиму, әмма бу қетимқи аччиқ қисмәтни бу йәргә йоллаш арқилиқ, ичкири өлкиләргә баридиған шинҗаңлиқ қериндашлиримниң көңлидә бу хил тәкшүрүшкә тәйярлиқи болсун дедим."

Хитайдики иҗтимаий таратқулар вә әркин асия радиоси қатарлиқ хәлқара таратқуларда тарқалған хәвәрләрдин, йеқинқи бирқанчә йилдин буян тирикчилик, саяһәт, хизмәт қатарлиқ түрлүк сәвәбләр билән хитай өлкилиригә барған уйғурларниң меһманханиларда ятақ алалмаслиқ, аммиви қатнаш васитилиридә тәкшүрүлүш һәтта йәрлик даириләр тәрипидин чиқирилған "шинҗаңлиқларни мәлум қилиш" уқтурушлири сәвәблик сақчиханиларға мәлум қилинип қаттиқ тәкшүрүлүш қисмитигә йолуқуш әһвалиниң көпәйгәнлики ашкариланмақта. Бу әһваллар хитай дөлити ичидә уйғурларни нарази қилған болса, бир қисим демократийә туйғусиға игә хитай пуқралириниң әйиблишигә учриди. Хәлқарада болса кишилик һоқуқ тәшкилатлири вә ғәрб демократик дөләтлири тәрипидин кишилик һоқуқниң еғир дәпсәндә қилиниши, миллий кәмситиш сиясити йүргүзгәнлик дәп қаттиқ тәнқидләшкә учримақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт