Xitay hökümiti Uyghur éli heqqide mexsus aq tashliq kitab élan qildi

Peyshenbe küni, xitay hökümiti Uyghur aptonom rayoni qurulghanliqining 60 yilliqi munasiwiti bilen aq tashliq kitab élan qildi.

Xitay merkizi téléwiziye istansisining bu heqtiki xewiridin qarighanda, aq tashliq kitabta Uyghur élining 60 yildin buyan ghayet zor iqtisadiy tereqqiyatlarni qolgha keltürgenliki, xelqning turmush süpitining zor derijide yaxshilan'ghanliqi, intérnétqa we barawer ma'arip hoquqigha érishkenliki bayan qilin'ghan. Uningda yene “Uyghur élidiki 12 millet öz ana tilini ishlitishke, milliy örp-aditi we dinini qoghdap qélishqa righbetlendürüldi” déyilgen.

Xitay hökümiti aq tashliq kitabida Uyghur éligha 60 yildin buyan 7.1 Tirilyon yüen yardem qilghanliqini eskertip ötken, emma Uyghur élining yer asti we yer üsti bayliqliridin qanchilik payda alghanliqini tilgha almighan.

Aq tashliq kitabta alahide otturigha qoyulghan nuqtilarning yene biri, Uyghur élidiki térrorluqqa qarshi küreshni kücheytish bolup, Uyghur aptonom rayonining re'isi shöhret zakir aq tashliq kitabning élan qilinish munasiwiti bilen bergen axbarat élan qilish yighinida atalmish “Üch xil küch” ke qarshi küreshni kücheytidighanliqini bildürgen.

Dunya Uyghur qurultiyi xitayning aq tashliq kitabini qattiq tenqid qildi. Ular xitay hökümiti élan qilghan bu aq tashliq kitabning emeliyetni qilchilikmu eks ettürmeydighanliqini bildürdi. Ular xitay hökümitining hökümranliqi astida Uyghurlarning siyasiy, ijtima'iy, iqtisadiy hoquqlirining qolidin tartiwélin'ghanliqini, Uyghurlarning öz ana tilini ishlitish, milliy medeniyiti we dinining cheklimige uchrap kelgenlikini hem shundaqla Uyghur élining yillardin buyan xitay hökümiti we ölkiliri teripidin sümürülgenlikini tekitlidi.