Ақсу вилайитидә "40 яштин юқири аяллар билән 50 яштин юқири әрләр" "кәспий маһарәт" бойичә тәрбийәлиндикән

Мухбиримиз ирадә
2021-10-21
Share

Уйғур елида "кәспий маһарәт билән тәрбийәләш" намидики һәрикәтниң кәң көләмдә иҗра қилиниватқанлиқи вә униң яш даирисиниң йәниму кеңәйгәнлики мәлум болмақта.

"ақсу хәвәрләр тори" елан қилған бир хәвәрдә мундақ дейилгән: "вилайитимиз кәспий маһарәт бойичә тәрбийәләшни кәң көләмдә қанат яйдуруп, әмгәкчиләрниң ишқа орунлишиш маһаритини әтраплиқ өстүрди. 9-Айниң ахириғичә, түрлүк толуқлима характерлик кәспий маһарәт тәрбийәсини қанат яйдуруп, 73 миң 800 адәм (қетим) ни тәрбийәләп, аптоном район чүшүрүп бәргән нишан-вәзипини 141.92 Пирсәнт тамамлиди."

Диққәт қозғайдиғини шуки, бу аталмиш "кәспий маһарәт билән тәрбийәләш" тә "40 яштин юқири аяллар билән 50 яштин юқири әрләр" ни муһим нуқта қилинған. Хәвәрдә мундақ дейилгән: "йезилардики 40 яштин юқири аяллар, 50 яштин юқири әрләрни муһим нуқта қилип, йеза игилик әмәлий гәвдисидә муқим ишқа орунлишиш бойичә өткәлгә һуҗум қилиш һәрикити йолға қоюлди."

Уйғур аптоном районлуқ даириләр давамлиқ һалда уйғур елида лагерларниң мәвҗутлуқини инкар қилғанда бу лагерларниң "кәспий маһарәт билән тәрбийәләш орни" икәнликини илгири сүрүп кәлгән иди. Хитай һөкүмити йәнә уйғурларниң мәҗбурий әмгәккә селиниватқанлиқини инкар қилғандиму, охшашла бу ишчиларниң "кәспий маһарәт бойичә тәрбийәлинип ишқа орунлаштурулғанлар" икәнликини илгири сүргән иди.

Чәт әлләрдики уйғур көзәткүчиләр ақсу вилайитиниң "кәспий маһарәт билән тәрбийәләш" тә, "40 яштин юқири аяллар билән 50 яштин юқири әрләр" ни муһим нуқта қилғанлиқини, райондики лагерларниң техиму кеңийиватқанлиқи вә аталмиш "тәрбийләш" нишанлириниң яш қураминиң оттура яшлиқлар қатлимиға қарап созуливатқанлиқини тәхмин қилмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт