Sherqiy asiya dölet bashliqliri yighinida Uyghurlarning nöwettiki weziyiti tilgha élin'ghan

Muxbirimiz irade
2021-10-28
Share

27-Öktebir charshenbe küni sherqiy asiya döletliri bashliqlar yighini sin arqiliq ötküzülgen bolup, mezkur yighinda Uyghurlarning kishilik hoquq weziyiti heqqide söz bolghan.

"Yaponiye waqti" gézitining xewiridin qarighanda, shu künidiki yighinda yaponiyening yéqinda wezipige olturghan bash ministiri tunji qétim söz qilghan bolup, u sözi jeryanida xitay hökümitining Uyghurlargha qaritiwatqan zor kishilik hoquq depsendichiliki, xongkongning démokratiyesining weyran qilinishi heqqidiki jiddiy endishilirini otturigha qoyghan.

Melum bolushiche, sherqiy asiya dölet bashliqliri yighini yéqindin buyan amérika bilen xitay otturisidiki ziddiyetning künséri küchiyishi bilen teng, asiya-tinch okyan rayoni, jenubi we sherqiy déngizning igilik hoquq mesilisi we teywen boghuzining muqimliqining keskinlishige qarita échilghan iken.

Mezkur yighin'gha amérika prézidénti jow baydénmu qatnashqan bolup, u yighinda amérikaning rayondiki tesirini eslige keltürüshni xalaydighanliqi, rayondiki shérikliri bilen birlikte démokratiye, kishilik hoquq, qanun bilen idare qilish we erkinlikni qollaydighanliqi heqqide wede bergen.

Yaponiye tashqiy ishlar ministirliqining tor bétide yaponiye bilen birge yighinda yene bashqa döletlerningmu Uyghurlarning we xongkongning kishilik hoquq weziyiti heqqidiki endishilirini otturigha qoyghanliqi déyilgen bolsimu, bu döletlerning kimliki éniq tilgha élinmighan.

Sherqiy asiya dölet bashliqliri yighini sherqiy jenubiy-asiya elliri ittipaqinimu öz ichige alidighan bolup, bular brunéy, kambodzha, hindonéziye, la'os, malaysiya, bérma, filippin, sin'gapor, tayland we wyétnam qatarliq döletlerni, shundaqla awstiraliye, xitay, hindistan, yaponiye, yéngi zélandiye, rosiye, koréye we amérikani öz ichige alidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet