Uyghur diyari barghanséri xitayning “Hayatliq kapaliti” bolup qalmaqta

Washin'gtondin muxbirimiz eziz teyyarlidi
2023.11.03

Xitay üchün éghir ijtima'iy mesililerdin biri xelqning hayatliqi üchün eng achquchluq bolghan ashliq mesilisini qandaq hel qilish bolup kéliwatqanliqi melum. Xitay hökümiti yillardin buyan her yili chet'eldin ashliq import qilish arqiliq dölet ichidiki éhtiyajni qamdap kelgen. “Statistika” (Statista) torining bu heqtiki melumatida körsitilishiche, xitay hazir dunya boyiche bughday import qilghuchi eng chong dölet bolup qalghan. 2022-Yilining özidila xitay import qilghan ashliqning miqdari 53 milyon tonnidin éship ketken.

Xitay hökümiti bashqurushidiki “Tengritagh” torining 2-noyabirdiki xewiride körsitilishiche, xitay hökümiti yéqinqi mezgillerde Uyghur diyarida ijra qiliwatqan bir qisim siyasetler del mushu mesilini chöridigen halda qanat yéyiwatqanliqi melum. Xewerde éytilishiche, bu yilliq küzgi hosul yighish mezgilide Uyghur diyaridin az dégendimu 20 milyon tonnidin köprek ashliqning toplinishi nöwettiki muhim xizmet nishanliridin bolup qalghan. Uyghur aptonom rayonluq yéza igiliki nazaritining mes'ulliridin tang yiwu bu heqte söz qilip “Bashqa jaylarning küzgi hosul yighish xizmiti ayaghlashti. Shimaliy shinjangda bu xizmet jiddiy orunlanmaqta” dégen hemde bu yil pütkül Uyghur diyarining ashliq mehsulatini 20 milyon tonnidin ashidu, dep körsetken.

Xitay hökümitining Uyghur diyarini asasliq ishlepchiqirish bazisi qilip qurup chiqishida bughday östürüsh bir muhim mezmun bolup, ichkirige ashliq yötkesh Uyghur diyaridin énérgiye yötkeshke oxshashla jiddiy dawam qiliwatqanliqi melum. “Xitay xewer tori” ning 3-noyabirdiki xewiride éytilishiche, 2023-yili 1-noyabirgha qeder jungghar oymanliqining shimalidiki “Qaramay 75” tebi'iy gaz quduqi 1992-yili qézilghandin tartip xitay sana'itini ikki yérim milyard küp métir tebi'iy gaz bilen teminleshni emelge ashurghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.