Нурмәмәт мусабай: хитай уйғур райондики қаршилиқ һәрикәтлириниң ашкарилинишини чәкләшни қанунлаштурди

Мухбиримиз шөһрәт һошур
2015-12-28
Share

Хитай һазирға қәдәр уйғур районида йүз бәргән қаршилиқ һәрикәтлириниң көп қисмини ахбараттин йошурған вә аз бир қисимни кәмтүк вә ениқсиз һалда хәвәр қилип кәлгән.

Бу хил вәқәләр һәққидә ахбаратқа йип учи бәргәнләр еғир җазалинип кәлгән иди. Шинхуа агентлиқиниң хитайниң йеңи террорлуқ қануни һәққидики бүгүнки хәвиридин қариғанда, хитай бу қанун арқилиқ юқириқи чәклимилирини қанунлаштурған.

Шинхуаниң бу һәқтики хәвиридә "қанундики барлиқ чәклимиләрниң мәқсити дорашниң (йәни һәвәс қилишниң) алдини елиш, алдинқи сәптә террорлуққа қарши вәзипә өтәватқанларни қоғдаш вә аммини сөз-чөчәкләрниң зийинидин қоғдаш" дейилгән. Йәнә хәвәрдин мәлум болушичә, мәзкур қанунниң бир маддисида "дорашқа (һәвәс қилишқа) йетәкләйдиған террорлуқ паалийәтлириниң тәпсилатини хәвәр қилиш яки тарқитишқа болмайду" дейилгән.

Бу һәқтә пикир баян қилған дуня уйғур қурултийи баш катипи нурмәмәт мусабай хитайниң уйғур райондики барлиқ қаршилиқ һәрикәтлирини террорлуқ дәп қарайдиғанлиқи, шуңа йеңи террорлуқ қанунидики мәзкур маддиниң маһийәттә уйғурларниң қаршилиқ һәрикәтлириниң ашкарилинишини чәкләшниң қанунлаштурулуши икәнликини илгири сүрди.

Нурмәмәт мусабай сөзидә йәнә, илгири сиясий қарар яки өз мәйличә иҗра қилиниватқан ахбарат чәклимисиниң әмдиликтә қанун арқилиқ иҗра қилинишиниң районда давам қиливатқан сақчи зораванлиқиға техиму кәң йол ачидиғанлиқини вә буниңдин дуня уйғур қурултийиниң әндишә ичидә икәнликини тәкитлиди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт