Asiya tetqiqat jem'iyiti: "Lagérdiki 386 neper Uyghur ziyaliysining teqdiridin endishe qilmaqtimiz"

Muxbirimiz shöhret hoshur
2019-03-29
Élxet
Pikir
Share
Print

Xelq'aradiki nopuzluq tetqiqat ilmiy jem'iyetlerdin bolghan asiya tetqiqat jem'iyiti tünügün, yeni 28-mart küni bayanat élan qilip, 2017 ‏-yilidin béri Uyghur rayondiki atalmish "Qayta terbiye merkezliri" de solinip yatqan 800 mingdin 2 milyon'ghiche tutqunning teqdiridin qattiq endishe qiliwatqanliqini bildürdi.

Bayanatta buning bir insan heqliri depsendichiliki ikenliki shundaqla ilmiy sahege nisbeten éytqanda, tetqiqat erkinlikining boghulushi ikenliki alahide eskertildi. Bayanatta yene mundaq déyilgen: "Bolupmu biz iz-dériki ghayib bolghan, shinjang uniwérsitétidin 21, shinjang pédagogika uniwérsitétidin 15, qeshqer uniwérsitétidin 13, méditsina uniwérsitétidin 6, shinjang ijtima'iy penler akadimiyesidin 6 neper bolup, jem'iy 386 neper Uyghur ziyaliysining teqdiridin qattiq endishe qiliwatimiz."

Rayondiki yerlik xelqlerning ana tilni qollinish we "Qur'an" ni öginish erkinlikining cheklen'genliki tilgha élin'ghan mezkur bayanatta chet'elde oqup yaki tetqiqat bilen shughullinip yurtigha qaytqan ilmiy xadim we oqughuchilarning qattiq so'al-soraqqa duch kelgenliki, qamaqqa élin'ghanliqi yaki iz-déreksiz yoqalghanliqi, hetta bezilirining ölüm xewirining delillen'genliki tilgha élin'ghan.

Mezkur jem'iyetning terepsiz bir ilmiy organ ikenliki, dunyada 7 ming ezasi bar xelq'arawiy bir akadémik teshkilat ikenliki bildürülgen bu bayanatta xitay da'irilirining tutqundiki ilmiy xadimlar we oqughuchilarni qoyup bérishi, ularni bixeter halda a'ilisi we ish orunlirigha qaytishigha kapaletlik qilishi telep qilin'ghan.

Melum bolushiche, asiya tetqiqat jem'iyiti 23 ‏-mart küni ötküzgen yilliq xizmet xulase yighinigha amérikadiki Uyghur adwokat nuri türkelnimu teklip qilghan. Nuri türkel bu yighinda Uyghur rayondiki lagérlar we lagérdiki Uyghur ziyaliylirining ehwali heqqide melumat bergen.

Toluq bet