Qasimjan abduréhimning ürümchidiki xizmetdashlirining eng az 7 yil késilgenliki ashkarilan'ghan

Washin'gtondin muxbirimiz irade teyyarlidi
2024.06.06

Amérika awazi radiyosining muxbiri we Uyghurlar uchrawatqan irqiy qirghinchiliq we insaniyetke qarshi jinayetlerni ashkarilap kéliwatqan qasimjan abduréhimning bildürüshiche, uning ürümchidiki sabiq xizmetdashliri xitay teripidin qolgha élinip türmige tashlan'ghan. Ularning türmige qamilishidiki birdinbir seweb bolsa qasimjan bilen tonush bolushi iken.

Amérika awazi radiyosining bu heqte tarqatqan xewiride körsitishiche, qasimjan bilen tonushluqi sewebidin késilgen mirkamil exmet, semet ababekri, abduqadir rozi, mexmut abduqéyum we ekber osman qatarliqlar eslide qasimjan ilgiri ürümchide qurghan “Atlan til mektipi” ning xizmetchiliri bolup, ularning her birining kem dégende yette yilliqtin qamaq jazasigha höküm qilin'ghanliqi melum.

Ehwalni yaxshi bilidighan menbening bu yil 5-ayda qasimjan'gha dep bérishiche, xitay da'iriliri bu yashlarni “Qasimjan teripidin dunya Uyghur qurultiyigha ezaliqqa qobul qilin'ghan” dégen jinayet bilen eyibligen.

Qasimjan abduréhim bu eyibleshlerni ret qilghan. U X ke yazghan inkasida “Méning burunqi xizmetdashlirim men bilen tonushluqi sewebidinla qolgha élin'ghan. Ular gunahsiz, ular derhal qoyup bérilishi kérek” dégen.

Xitay hökümitining Uyghur élide keng kölemlik tutqunni yolgha qoyush jeryanida mushundaq xalighanche eyibleshlerni keng qollan'ghanliqi we eyiblen'güchini türlük qiyin-qistaqlar bilen eyibnamini qobul qilishqa qistighanliqi radiyomiz teripidin igillen'genidi.

Dunya Uyghur qurultiyining bayanatchisi zumret'ay erkin amérika awazi radiyosigha qilghan sözide “Buning xitayning öz meyliche eyiblesh herikitining yene bir misali ikenlikini, xitay hökümitining ilgiri sürginining eksiche rayondiki xalighanche tutqun we öch élish heriketlirining toxtap qalmighanliqini körsitip béridighanliqini” éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.