Yer shari waqit géziti: “Yiraq gherbiy rayonda 15 yilliq heqsiz ma'arip yolgha qoyulidu”

Bügün xitayda chiqidighan “Yer shari waqit géziti” ning in'glizche sanida Uyghur aptonom rayonida bu yil dékabirdin bashlap 15 yilliq heqsiz ma'aripning yol qoyulidighanliqi xewer qilindi.

Xewerde déyilishiche, bu 15 yilliq heqsiz ma'aripning 3 yili toluq ottura mektepler üchün, 9 yili bashlan'ghuch we toluqsiz ottura mektepler üchün, qalghan 3 yili yesli-balilar baghchisi üchün iken. Mezkur gézitining “Yiraq chégradiki heqsiz ma'arip” mawzuluq bu xewiride 15 yilliq heqsiz ma'aripning meqsetliridin birining Uyghurlar arisida radikal idiyege boshluq qaldurulmasliq ikenliki eskertilgen.

Xewerde eskertilishiche, Uyghur rayonida yolgha qoyulidighan bu 15 yilliq heqsiz ma'ariptin rayondiki xitay köchmenlirimu ortaq paydilinidiken. Xewerde yene mezkur belgilimining rayonda milletler barawerlikini ilgiri sürüsh üchün tüzülgenliki isharetlen'gen.

Emma muhajirettiki Uyghur közetküchiler, Uyghurlardiki ma'arip mesilisining san emes, sapa mesilisi ikenlikini, Uyghurlarning sap milliy ma'aripta terbiyilinish we zamaniwi bilimlerni öginish hoquqi barliqini tekitlep kelmekte. Washin'gtondiki Uyghur közetküchilerdin uchqunjan ependi, “Xitay ebediy eminlik namidiki mustemlikichi istratégiyedin waz kechmigiche, bu yerde élip bérilghan herqandaq bir islahat yaki tengshesh rayondiki milletler mesilisini hel qilalmaydu,” dédi.