Уйғур районида кевәзгә тарқалған бир хил вирусниң җиддий тәһдит пәйда қиливатқанлиқи илгири сүрүлди

Мухбиримиз әркин
2019-09-06
Елхәт
Пикир
Share
Принт

Уйғур аптоном районида кевәзләргә бир хил вирус тарқилип, районниң пахтичилиқ игиликигә җиддий тәһдит пәйда қиливатқанлиқи илгири сүрүлди. Хоңкоңдики «җәнубий хитай сәһәр почтиси» гезитиниң хәвәр қилишичә, шихәнзә йеза игилик университетидики бәзи мутәхәссисләр вирусниң «нөвәттә кәң көләмлик тарқалмиған болсиму, лекин униң җиддий тәһдит пәйда қилғанлиқи вә кишиләрни биарам қиливатқанлиқи» ни билдүргән.

Мәзкур университеттики бир кевәз тәтқиқатчиси «биз алақзадилик ичидә чарә-тәдбиргә еһтияҗлиқ болуватимиз» дегән. «Җәнубий хитай сәһәр почтиси» гезитиниң илгири сүрүшичә, әгәр бу вирусниң дәрһал алди елинмиса, у хитай пахтичилиқ игиликигә 50 милярд йүән зиян салидикән. 

Уйғур аптоном райони хитайниң асаслиқ пахта ишләпчиқириш базиси болуп, хитайда ишләпчиқирилған пахтиниң 84 % ни игиләйду. Лекин мәзкур вирус хитай һөкүмитиниң ичкири өлкиләрдики тоқумичилиқ карханилирини уйғур райониға йөткәп чиқип, йиғивелиш лагерлиридики бир қисим уйғур тутқунларни бу карханиларда мәҗбури әмгәккә селиватқанлиқи илгири сүрүлүватқан бир мәзгилдә тарқалған. Йеқинда америкадики хитай демократлириниң «җуңго пуқралар күчи» намлиқ тәшкилати уйғур районидики пахтичилиқ вә райондики тоқумичилиқ карханилири һәққидә доклат елан қилип, хитайниң лагердики уйғурларни пахтизарлиқ вә тоқумичилиқ карханилирида мәҗбури әмгәккә селиш арқилиқ униң «хәлқара пахта-тоқумичилиқ тәминат зәнҗирини зәһәрлигәнлики, хитайдин пахта-тоқумичилиқ мәһсулатлирини импорт қилишни тохтитишниң вақти кәлгәнлики» ни билдүргән. 

«Җәнубий хитай сәһәр почтиси» гезитиниң хәвиридә қәйт қилинишичә, ғоллуқ өсүмлүкләр вирус түри‏ - бегомо вирус түригә мәнсуп болған бу вирус кевәз йопурмиқиниң қуруп кетиши, кевәз ғолиниң өсүши вә кевәз ғозикиниң йирикләп кетишини кәлтүрүп чиқирип, мәһсулат миқдариға җиддий тәсир қилидикән. Хәвәрдә, хитай муәссәсилириниң бу вирусқа қарши бир хил үнүмлүк дора ишләпчиқарғанлиқи, лекин бәзи мутәхәссисләр әгәр бу дора бәк көп ишлитилсә вирусниң иммунитет күчини ашуруветиши мумкин, дәп әндишә қиливатқанлиқи тәкитләнгән.

Пикирләр (0)
Share
Толуқ бәт