Хитай уйғур елида башқурулидиған бомба синиқи елип барған

Мухбиримиз әзиз
2017.12.29

Хитай ракета қисимлири йеқинда уйғур аптоном районида “шәрқ шамили‏-17” намлиқ илғар типлиқ башқурулидиған бомба синиқи елип барған. Хоңкоңда чиқидиған “әйнәк гезити” ниң японийә “дипломат” журнилидин нәқил кәлтүрүп хәвәр қилишичә, мәзкур синақ бу йил 11‏-айниң 1‏-вә 15‏-күнлири икки қетим елип берилған. Синақта 2 данә башқурулидиған бомба гәнсу өлкисиниң җючүән шәһиридики һәрбий базидин уйғур елиниң чәрчән наһийиси тәвәсидики қумлуққа қаритип қоюп берилгән.

Хәвәрдә, башқурулидиған бомбиларниң нишанға тәгкәнлики қәйт қилинған болсиму, әмма конкрет нишанниң чәрчән наһийисидики қайси орунда икәнлики вә униң аһалиләр олтурушлуқ районлар билән болған мусаписи тилға елинмиған. 

Хитай һөкүмити илгири лопнорда ядро синақ базиси қуруп, 1964‏-йилдин 1996 ‏-йилғичә аз дегәндә 47 қетим синақ елип барған. Муһит қоғдиғучилар, 47 қетимлиқ синақ йәрлик хәлқниң саламәтлики вә екологийилик муһитқа еғир бузғунчилиқ қилғанлиқини илгири сүрүп кәлди. Уларниң қәйт қилишичә, ядро синиқи уйғурларда лимфа раки қатарлиқ һәр хил өсмә кесәлликләрниң ямрап кетишини кәлтүрүп чиқарған. 

Хитай ракета қисимлири синақ қилған “шәрқ шамили17-” болса оттура мусапилик балистик башқурулидиған бомба болуп, униң учуш мусаписи 1800 километирдин 2500 километирғичә йетидикән. Бу қетим хитай ракета қисимлири қоюп бәргән башқурулидиған бомба җючүәндин чәрчәнгичә 1400 километир учқан.

Хәвәрдә көрситишичә, оттура мусапилик мәзкур башқурулидиған бомба ядро оқ беши яки мунтизим оқ беши елип йүрәләйдикән. японийә “дипломат” журнилиниң америка истихбарат хадимлиридин нәқил кәлтүрүшичә, мәзкур башқурулидиған бомба 2020‏-йиллири рәсмий урушта ишлитилидиған һалға келиши мумкин икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.