Xitay Uyghur élida bashqurulidighan bomba siniqi élip barghan

Xitay rakéta qisimliri yéqinda Uyghur aptonom rayonida “Sherq shamili‏-17” namliq ilghar tipliq bashqurulidighan bomba siniqi élip barghan. Xongkongda chiqidighan “Eynek géziti” ning yaponiye “Diplomat” zhurnilidin neqil keltürüp xewer qilishiche, mezkur sinaq bu yil 11‏-ayning 1‏-we 15‏-künliri ikki qétim élip bérilghan. Sinaqta 2 dane bashqurulidighan bomba gensu ölkisining jyuchüen shehiridiki herbiy bazidin Uyghur élining cherchen nahiyisi tewesidiki qumluqqa qaritip qoyup bérilgen.

Xewerde, bashqurulidighan bombilarning nishan'gha tegkenliki qeyt qilin'ghan bolsimu, emma konkrét nishanning cherchen nahiyisidiki qaysi orunda ikenliki we uning ahaliler olturushluq rayonlar bilen bolghan musapisi tilgha élinmighan. 

Xitay hökümiti ilgiri lopnorda yadro sinaq bazisi qurup, 1964‏-yildin 1996 ‏-yilghiche az dégende 47 qétim sinaq élip barghan. Muhit qoghdighuchilar, 47 qétimliq sinaq yerlik xelqning salametliki we ékologiyilik muhitqa éghir buzghunchiliq qilghanliqini ilgiri sürüp keldi. Ularning qeyt qilishiche, yadro siniqi Uyghurlarda limfa raki qatarliq her xil ösme késelliklerning yamrap kétishini keltürüp chiqarghan. 

Xitay rakéta qisimliri sinaq qilghan “Sherq shamili17-” bolsa ottura musapilik balistik bashqurulidighan bomba bolup, uning uchush musapisi 1800 kilométirdin 2500 kilométirghiche yétidiken. Bu qétim xitay rakéta qisimliri qoyup bergen bashqurulidighan bomba jyuchüendin cherchen'giche 1400 kilométir uchqan.

Xewerde körsitishiche, ottura musapilik mezkur bashqurulidighan bomba yadro oq béshi yaki muntizim oq béshi élip yüreleydiken. Yaponiye “Diplomat” zhurnilining amérika istixbarat xadimliridin neqil keltürüshiche, mezkur bashqurulidighan bomba 2020‏-yilliri resmiy urushta ishlitilidighan halgha kélishi mumkin iken.