Xitay da'iriliri Uyghur rayonida tömüryol saqchilirining qoral ishlitish meshiqini kücheytken

Xitay da'iriliri Uyghur rayonida tömür yol saqchilirining qoral ishlitish meshiqini kücheytken. Xitay taratquliri bu tömüryol amanliqini qoghdashni meqset qilghanliqini bildürsimu, lékin közetküchiler bu saqchilarning qoral ishlitish da'irisi kéngeytiliwatqanliqini körsitidu, dep qarimaqta.

Xitaydiki “Junggo xewerliri” torining 26‏-mart ashkarilishiche, 25‏-mart küni ürümchi tömüryol saqchi idarisi bilen sheherlik j x idarisining alahide saqchi etriti birleshme meshiq élip bérip, kichik we ottura tipliq qorallarni ishlitishni meshiq qilghan. Meshqte, nuqtiliq jiddiy ehwallarda nishan'gha qandaq étish, yéqin arida turup qandaq étish, qandaq qarigha élish, ittik inkas qayturush, téz nishan'gha élish dégendek maharetlerni ögen'gen. .

Xitay hökümiti 2009‏-yili yüz bergen “5‏-Iyul weqesi” din kéyin özining amanliq küchlirige zor hoquq bérip, guman qilghan herqandaq kishige oq chiqirish hoquqi bergen. Bu hoquq rayonda tömüryol torining kéngiyishige egiship tömür yol saqchilirighimu kéngeytilgen. Lékin xitayning rayondiki saqchilargha bu xil zor hoquqlarni bérishi xitay saqchilirining kishilik hoquqqa xilap nurghun qanliq weqelerni keltürüp chiqirishigha seweb bolghan. Kishilik hoquq teshkilatliri xitay amanliq küchlirining hoquqini chekleshni, ularning üstidiki nazaretni kücheytishni telep qilip kelgen. Lékin, xitay hökümiti bu chaqiriqlargha héchqachan qulaq sélip baqmighan idi. “Junggo xewerliri” torining ilgiri sürüshiche, ürümchi sheherlik j x idarisi bilen tömüryol saqchilirining 25‏-mart küni qoral ishlitish meshiqi 2 kün dawamlashqan.