Биңтуән 2- девизийәси тәклимаканниң җәнубий гирвикидә 15 миң мо терилғу йәр ачидиғанлиқини елан қилған

Мухбиримиз қутлан
2016-08-22
Елхәт
Пикир
Share
Принт

Хитайниң уйғур елида турушлуқ ишләпчиқириш-қурулуш армийәсиниң 2-девизийәси тәклимаканниң шәрқий җәнуби гирвикидә 15 миң мо қумлуқни тизгинләп терилғу йәргә айландуридиғанлиқини елан қилған.

Хитай хәвәр ториниң бу һәқтики мәхсус хәвиригә қариғанда, биңтуәнниң 2-девизийәсигә қарашлиқ 37-полки 10 милйон сомдин артуқ мәбләғ селип 15 миң мо қумлуқни тизгинлигәнликини, һазир 5500 мо йәрни териғили болидиғанлиқини илгири сүргән.

Мәлум болушичә, биңтуәнниң 2-девизийәси байинғолин аптоном областиға җайлашқан болуп, униңға қарашлиқ 12 полк бар икән. 2-Девизийәниң көплигән полклири лопнур наһийәси билән чақилиқ наһийәси арилиқида болуп, бу районда лопнур, крорән вә мирән қатарлиқ қәдимки тарим мәдәнийитиниң парлақ излири җайлашқан.

Тарихта тарим дәрясиниң төвән еқими лопнур көлигичә еқип берип, у йәрдин қумлуққа сиңип кирип, тәклимакан чөлиниң шәрқий җәнуби гирвикидики бостанлиқларниң мәвҗутлуқини капаләтләндүрүп кәлгән иди. Һалбуки, биңтуәнниң бу районда тоғрақлиқларни қалаймиқан кесип, һәссиләп боз йәр ечиши нәтиҗисидә өткән әсирниң 70-йиллириға кәлгәндә тарим дәрясиниң төвән еқими үзүлүп қалған. Буниң билән лопнур көлиму қуруп кәткән.

Биңтуән 2-девизийәсиниң лопнур көлиниң қуруп кетишидәк бу муһит паҗиәсидин қилчә савақ алмай районда давамлиқ боз йәр ечиши муһит мутәхәссислиридә күчлүк әндишә пәйда қилмақтикән.

Пикирләр (0)
Share
Толуқ бәт