Uyghur yézilirida xitayning chaghan bayrimini tebriklesh pa'aliyetliri uyushturulmaqta

Xitayning en'eniwi chaghan bayrimi harpisida Uyghurlar keng kölemde chaghanliq pa'aliyetlerge teshkillenmekte.

“Xitay xewerler tori” we “Tengritagh tori” qatarliq hökümet axbaratliridiki xewerlerde körsitilishiche, bu yilliq chaghan bayrimi harpisida qeshqer, xoten, atush, aqsu qatarliq Uyghurlar merkezlik tarqalghan jaylardiki Uyghur ammisi xitayche yosunda kiyinip yanggér ussuli oynash, ejdiha we shir oynitish, xitaylar bilen birlikte juwawa tügüp yéyish arqiliq chaghanni kütüwélishqa teshkillen'gen.

“Xitay xewerler tori” 22-yanwar küni tarqatqan “Shinjangning jenubidiki yéza-qishlaqlar qizilgha pürkündi” mawzuluq xewerde körsitilishiche, yamanyar yézisidiki amma “Kentte turushluq kadirlar” bash etriti teshkilligen chaghanliq pa'aliyetler boyiche xitayning en'eniwi kiyimlirini kiyip, yelpügüch usuli, künlük usuli oynashqa we “Milletler ittipaqliqi juwawisi” tügüp yéyishke teshkillen'gen. Resimlik xewerde, bir xitay ayalning Uyghur balisigha juwawa yégüzüwatqanliqi körsitilgen.

Tengritagh torida bérilgen bu heqtiki xewerde, yopurgha nahiyesi yopurgha yézisi qaygül kentidiki “Kentte turushluq kadirlar etriti” ning kent ahaliliri bilen birlikte chaghanliq mesnewi chaplap, panuslarni asqanliqi xewer qilin'ghan.

Xitay hökümiti Uyghur élide 2017-yilidin bashlap keng kölemlik tutqun herikitini bashlap, Uyghurlarni lagérgha qamighan bilen bir waqitta yene, xitayning “Chaghan bayrimi”, “Panus bayrimi” qatarliq en'eniwi bayramlirini daghdugha qilip ötküzüshnimu mas qedemde kücheytken.

Uyghurlarni tetqiq qilip kéliwatqan amérikiliq antropolog derrin baylér ilgiri mushu heqte élan qilghan bir maqaliside, xitay hökümitining chaghan pa'aliyetlirini, Uyghurlarning xitay dölitige bolghan sadaqitini sinaydighan bir imtihan meydani süpitide qolliniwatqanliqini bildürgen idi.

D u q ning bayanatchisi dilshat réshit bu heqte pikir bayan qilip, “Xitay hökümitining Uyghurlarni xitayche bayramlarni ötküzüshke teshkillishi ularning assimilyatsiye pa'aliyitini ashkara ijra qilishidin bashqa nerse emes” dep körsetti.