Ürümchide “Islam dinining ottura hal yol tutush idiyisi” témisida xelq'araliq yighin chaqirilghan

Muxbirimiz irade
2016.07.21
Share on WhatsApp
Share on WhatsApp

Tengritagh torining xewiridin melum bolushiche, 20-iyul küni ürümchide “Islam dinining otturahal yol tutush idiyisi” témisida bir xelq'araliq muhakime yighini échilghan. Yighin'gha xitay, rusiye, qazaqistan, tajikistan, qirghizistan, özbékistan qatarliq alte dölettin kelgen diniy zatlar, tetqiqatchi we hökümet xadimliri qatnashqan.

Yighin 21‏-iyul küni axirliship “Ottura hal yol idiyisini teshebbus qilip esebiylikke qarshi turush” namida xitabname élan qilin'ghan.

Xewerde éytilishiche, Uyghur aptonom rayonning re'isi shöhret zakir yighinda söz qilip, nurghun döletler hazir diniy esebiylikning ziyinigha uchrawatidu. Shinjangmu diniy esebiylikning singip kirishi we ziyankeshlikige uchrighan rayonlarning biri. Diniy esebiylikke qarshi turup, döletning birlikini, milletler ittipaqliqi we ijtima'iy muqimliqni qoghdash shinjangdiki hemme kishining ortaq iradisi, dep söz qilghan.

Ürümchide chaqirilghan bu yighin chet'ellerdiki közetküchilerning diqqitini qozghidi. Ular, xitay hökümitining Uyghur élidiki herqandaq bir naraziliq herikitini “Diniy radikalliq”, “Térrorluq” qa baghlap qattiq basturup kelgenlikini, bu yighin arqiliq ottura asiyadiki qoshna döletlerningmu hemkarliqini közlewatqan bolushi mumkinlikini éytti.

Tengritagh tori xewiride, herqaysi döletlerdin kelgen wekillerning öz döletliridiki diniy esebiylikke qarshi turush tejribilirini almashturup, öz-ara hemkarlishishni pilan qilghanliqini bildürgen. Chet'ellerdiki kishilik hoquq organliri bolsa xitay hökümitining Uyghurlarning eng asasiy din'gha ishinish heqlirinimu cheklesh arqiliq radikalliqqa yol échip bériwatqanliqini eyiblep kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.