Uyghur élide chaghan mezgilide xitay puqralar üchün qulay shara'it yaritilmaqchi

Muxbirimiz ümidwar
2018-01-28
Share

Uyghur aptonom rayoni da'iriliri xitay millitining en'eniwi bahar bayrimi - chaghan mezgilide her türlük bixeterlik tedbirlirini kücheytish bilen bir waqitta xitay puqralirining bayramliq seper ishlirigha alahide qulayliq shara'it yaritiwatqanliqi hemde bixeterlik tekshürüshni kücheytiwatqanliqi inkas qilinmaqta.

"Shinjang géziti" ning xewiridin ashkarilinishiche, 16-féwral künidin bashlap ötküzülidighan chaghan bayrimida zor sandiki xitay ahalisi xitay ichkiri ölkilirige we yaki Uyghur rayoni ichide yötkilip, ata-ana, uruq-tughqanliri bilen jem bolidighan bolup, ene shu pa'aliyetler üchün qulayliq shara'it yaritish meqsitide xitay sheherlirige qatnaydighan poyiz qétim sani köpeytilidiken, mesilen, ürümchidin shangxey we chéngdu liniyeside biwasite qatnaydighan 16 poyiz köpeytilidiken.

Qatnash da'iriliri chaghan mezgilidiki poyizlardiki qatnash sanining töt milyon 4 yüz ming adem qétimgha yétishini mölcherligen. 

Buning bilenla qalmastin yene xitay awi'atsiye da'iriliri Uyghur rayoni ichi we xitayning bir qisim chong sheherliri arisidiki hawa qatnishidiki nöwetchi ayropilan sanini köpeytidiken we yéngidin ürümchi-nenchung-wénju liniyisi we bashqa biwasite liniyelerni achidiken.

Xewerdin melum bolushiche, chaghan mezgilidiki bu xil qatnash qolayliqlirigha mas halda ürümchi, ghulja, aqsu korla qatarliq sheherlerdiki 7 chong wogzalda 17 bixeterlik tekshürüsh ötkili quridiken we yene bir qisim wogzallarda yoluchilargha qarita "Yéshil yol" tesis qilinidiken. Da'iriler bularning hemmisini yoluchilar üchün qulayliq yaritish dep atighan.

Emma, xelq'ara metbu'at uchurlirida éytilishiche, xitay da'iriliri hazir Uyghur rayonining hemmila yéride, kocha, jama'et orunliri we qatnash orunlirida zor sandiki kaméralarni orunlashturup, tekshürüsh we nazaretni kücheytiwetken. Uyghur közetküchilerning inkas qilishiche, bu xil tekshürüsh we nazaret qilishning asas nishanliri Uyghur qatarliq milletler bolmaqta, ayroport, poyiz istansisi qatarliq jaylardiki Uyghurlargha qaritilghan bixeterlik tekshürüsh xitaylargha qarighanda alahide qattiqliqi bilen perqliq bolup kelmekte iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet