‍Уйғур дияридин хитай өлкилиригә тошулған ток 500 милярд киловатқа йеқинлап қалған

Бир қисим мутәхәссисләр “хитайниң енергийә амбири” дәп атаватқан уйғур дияридин хитай өлкилиригә өткән он йил ичидә 500 милярд киловатқа йеқин ток тошулған. Хитай һөкүмәт мәтбуати “шинҗаң гезити” ниң баян қилишичә, тошулған 487 милярд 500 милйом киловат бу токниң омумий миқдари нормал әһвалда пүткүл хитайдики бир йерим милярд 400 милйон нопусниң 162 күнлүк һаҗитигә йетидикән. Бу токларниң йөткилиши һәрқайси шәһәрләрдики “ток топлаш вә йоллаш понкити” арқилиқ ишқа ашидикән. Қумул шәһәрлик електр йоллаш ширкитиниң директор ярдәмчиси ли яҗе бу һәқтә әһвал тонуштуруп: “өткән бир йилда көмүр баһаси өрләп кәткән болсиму биз йәнила ток йоллаш вәзиписини муддәттин бурун орундап болдуқ. Биз бу арқилиқ мәмликитимизниң иқтисадий тәрәққият омумий вәзийитиниң йүксилишигә хизмәт қилдуқ” дегән.

Хәвәрдә ейтилишичә, уйғур диярида ток ишләпчиқиришта асаслиқи көмүр көйдүрүлидиған болуп, көмүр канларниң көмүрлири алди билән ток ишләпчиқиришқа берилидикән. Һалбуки көмүр көйдүрүштин һасил болидиған ғайәт зор муһит булғиниши һәққидә хәвәрдә бир еғизму сөз қилинмиған. Шундақла уйғур дияридики миңлиған он миңлиған уйғур деһқанлириниң қишлиқ иссиниш үчүн көмүр елишқа қурби йәтмәй соғуқта мислисиз қийниливатқанлиқиму тилға елинмиған. Әмма хитай һөкүмити мушу хилдики ашкара һәмдә ғайәт зор миқдардики байлиқ йөткәп кетишкә көз юмған һалда “уйғурларни бай қилишқа”, “намратлиқтин қутулдурушқа көч чиқириватимиз” дегән тәшвиқатини қилип кәлмәктикән.