Uyghur aptonom rayonluq partkom iqtisad xizmet yighini chaqirip, 2020-yilliq iqtisadi orunlashturush élip barghan

Uyghur aptonom rayonluq partkom 17‏-dékabir küni iqtisadi xizmet yighini chaqirip, 2020‏-yili rayonning Uyghurlarni rayon'gha yötkep kélin'gen xitay zawut-karxanilirida mejburiy emgekke sélish asasidiki iqtisadiy igilik sheklining dawamlishidighanliqi tekitlen'gen. Xitay taratqulirining xewer qilishiche, yighinda béyjing iqtisad xizmiti yighinining rohi yetküzülüp, hazirqi iqtisadiy weziyet tehlil qilin'ghan, shundaqla kéler yilliq iqtisadi orunlashturush élip bérilghan.

Yighinda “Partiye merkiziy komitétining kéler yilliq iqtisad xizmiti toghrisidiki tedbir-orunlashturmilirigha masliship, shinjang iqtisadining yuqiri süpetlik tereqqiyatigha türtke bolush” tekitlen'gen. Közetküchilerning qeyt qilishiche, xitay taratquliridiki mezkur yighin'gha da'ir xewerler kompartiyening bir qisim xitay zawut karxanilirini Uyghur rayonigha yötkep, Uyghurlarni bu karxanilarda heqsiz yaki erzan emgek küchi süpitide mejburiy emgekke sélish asasidiki iqtisadi igilik sheklining dawamlishidighanliqini körsetmekte iken.

“Shinjang géziti” ning xewiride, yighinda kéler yili dawamliq “Muqimliq, tereqqiyat, xelq turmushidin ibaret üchni bir gewde qilishta ching turup, ishqa orunlashturushni küchep muqimlashturup we kéngeytip, ma'arip ishlirini zor küch bilen tereqqiy qildurup. . . . . . . . Ijtima'iy kapalet sistémisini mukemmelleshtürüp, sheher-yéza emin öy qurulushini yolgha qoyup. . . . . . Bixeterlik sistémisi qurulushini yenimu kücheytip, her millet ammini. . . . . . . . Bixeterlik tuyghusigha ige qilish” tekitligenliki ilgiri sürülgen.

Xitayning 2017‏-yili bashlan'ghan keng kölemlik tutqunida lagérlargha qamalghan nurghun Uyghur zawut-karxanilargha yötkep kélinip, rayonda mejburiy emgek asas qilin'ghan bir xil igilik shekillendürülgen. Lékin, bu xil igilik xelq'araning tenqidige uchrighan. Amérika hökümiti bu xil karxanilarda ishlen'gen bezi mehsulatlarni chekligen idi.

“Shinjang géziti” ning bildürüshiche, yighinda yene xitay zawut-karxanilirini jelp qilishni dawamliq kücheytish tekitlinip, “Kesipler arqiliq shinjanggha yardem bérishni puxta algha siljitish, türlük karxana we jem'iyet kapitalini pütün shinjang da'iriside meblegh sélip kesiplerni güllendürüshke righbetlendürüsh, yéteklesh؛ adil riqabet muhiti yaritip, yéngiche hökümet-sodigerler munasiwiti ornitish, puqrawi igilikni zor küch bilen tereqqiy qildurush” telep qilin'ghan.