Даириләр үрүмчидики нопуссиз ишсизларға күнлүки 20 сом беридикән

Мухбиримиз гүлчеһрә
2017-05-02
Share

Хитай хәлқ ториниң 28-апрел үрүмчи шәһәрлик адәм күчи байлиқи вә иҗтимаий капаләт идарисиниң кәспий иқтидар қурулуши башқармисидин игилигән хәвиригә қариғанда, нопуси үрүмчидә болмиған, бирақ үрүмчидә давамлиқ турушлуқ һәр милләт әмгәкчилири пәқәт қанунда бәлгиләнгән әмгәк қилиш йеши даириси ичидә болса, үрүмчи шәһәрлик адәм күчи байлиқи вә иҗтимаий капаләт тармақлири тәшкилләп қанат яйдурған ишқа орунлишиш иқтидари бойичә тәрбийиләш курсиға һәқсиз қатнашса болидикән. Даириләр йәнә һәр күни, һәр бир адәмгә 20 сом қатнаш вә тамақ толуқлимиси беридикән.

Бу, үрүмчи шәһириниң тунҗи қетим үрүмчи нопусида болмиғанларни һәқсиз ишқа орунлишиш иқтидари бойичә тәрбийиләш курси ечиши болуп, хәвәрдә буниңдики мәқсәт, курс арқилиқ үрүмчи нопусида болмиған кишиләрниң ишқа орунлишиш иқтидари вә кәспий иқтидарини ашуруп, уларни үрүмчи шәһиригә йеңидин мәбләғ селип орунлашқан ширкәт, карханиларға берип ишләшкә йетәкләш дәп көрситилгән.

Үрүмчи даирилири «баһар шамили» дәп атиған яқа юртлуқ ишләмчиләрни ишқа орунлаштуруш программисиниң бу йиллиқини‏ 7, 8 вә 9-апрел ачқан иди. Буниңда 160 кархана орунлар 5657 иш орни билән тәминлигән. Инкаслар вә көзәткүчиләр үрүмчидә бу хил иш пурсәтлири вә әвзәл сиясәтләрниң хитай көчмәнлирини мәнпәәтләндүрүшни мәқсәт қилидиғанлиқини көрситип кәлмәктә.

Чүнки, хитай һөкүмитиниң 2009-йилидики 5-июл вәқәсидин кейин алған тәдбирлириниң бири, яқа юртлуқ уйғурларни үрүмчидин тарқақлаштуруш болуп, уйғурларниң тәвәликини қаттиқ башқуруш тәдбирини йолға қойған. Шундақла даириләр 2014-йили 5-айниң 1-күнидин башлап «қулайлиқ карта» түзүмини йолға қойғандин буян, үрүмчигә кәлгән яқа юртлуқ уйғурларниң үрүмчидә туруш, оқуш, ишләш вә саяһәт, давалинишқа охшаш нурғун ишларда тосалғуға учрап келиватқанлиқи мәлум.

Һалбуки хитай даирилири, хитай көчмәнләрниң үрүмчи нопусиға өтүшиниму қолайлаштурған болуп, улар өй сетивелиш яки ишқа орунлишиш арқилиқла үрүмчи нопусиға өтәләйду. Паспорт беҗириштиму уйғурларға қариғанда асанлиқ яритилған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт