Uyghur diyarida iqtisadiy délolargha siyasiy délogha qarighanda yenggil jaza bérilmekte
2017.12.25
Uyghur diyarida yéqindin buyan pash bolghan we sot hökümi chiqirilghan iqtisadiy délo jawabkarlirigha herqachan “Siyasiy” xaraktérdiki délolargha chétilip qalghanlargha qarighanda yenggil jaza bériliwatqanliqi melum bolmaqta.
Yéqinda ili oblastliq sehiye we pilanliq tughut komitétining sabiq partiye sékrétari shü xongyu'en'ge chiqirilghan sot hökümi buni yene bir qétim ispatlidi.
“Xitay qanun tori”ning 25-dékabirdiki xewirige qarighanda, bu yil 56 yashqa kirgen jawabkar shü xongyu'en 1999-yilidin 2014-yilighiche ili oblastining sehiye sahesidiki hoquqidin paydilinip herqaysi doxturxanilar, dora zawutliri we dorixanilardin 18 milyon somdin artuq para yégen. Emma ürümchi sheherlik ottura sot mehkimisi ötken hepte uninggha 11 yilliq qamaq jazasi höküm qilghan.
Radiyomizning yéqinqi mezgillerdiki ehwal igileshliri jeryanida herqaysi jaylardiki barghanséri küchiyip bériwatqan siyasiy kontrolluq sewebidin minglighan Uyghurlargha tilgha alghuchiliki yoq “Siyasiy” mesile üchün muddetsiz yaki 10-20 yilliq qamaq jazaliri bériliwatqanliqi melum. Uyghurlar diyaridiki weziyetni yéqindin közitip kéliwatqan pa'aliyetchilerdin dunya Uyghur qurultiyining bayanatchisi dilshat réshit bu xildiki ehwallar heqqide toxtilip, “Uyghurlar diyarida para yéyish peqet hoquq tutuwatqan xitay rehbiriy kadirlarningla qolidin kélidu. Emma ulargha héchqachan éghir jaza bérilgen emes,” dédi.