Атақлиқ қазақ диний затлиридин бақитхан мирзан хитай җаза лагерида вапат болған

Хитай һөкүмити тәрипидин 2018-йили тутқун қилинип 14 йиллиқ қамаққа һөкүм қилинған атақлиқ қазақ диний затлиридин бақитхан мирзан 9-март күни хитай җаза лагерида вапат болған. “азадлиқ радийоси” ниң хәвәр қилишичә, бақитқан мирзанниң қазақистанда турушлуқ қериндиши алмахан мирзан бақитхан мирзанниң 9-март күни җаза лагирида вапат болғанлиқини елан қилған. Алмахан мирзанниң ейтишичә, у вапат болуштин бурун бақитхан мирзанниң уйғур райони вә қазақистандики уруқ-туғқанлири хитай даирилиридин униң саламәтлик ‍әһвалини көздә тутуп қоюп беришни тәләп қилған болсиму, лекин бу тәләп рәт қилинған.

Алмахан мирзан нәччә йилдин буян хитайниң астанадики баш әлчиханиси вә униң алмутадики консулханиси алдида наразилиқ намайиши қилип, хитай лагерлиридики уруқ-туғқанлириниң қоюп берилишини тәләп қилип кәлгән әрздарларниң бири болған. Хитай һөкүмити 2017-йили башлиған чоң тутқунда уйғурларни кәң көләмлик тутқун қилипла қалмай, хели көп сандики қазақ пуқралириниму ‍охшаш сәвәбләр билән тутқун қилип, лагерларға қамиған яки қамақ җазалириға һөкүм қилған.

Қазақистан һөкүмити лагердики бир қисим қазақ пуқралирини қутулдуруп чиққан болсиму, лекин хитайниң райондики уйғур, қазақ вә башқа түркий хәлқлиригә қаратқан кәң көләмлик бастурушиға қарита асасән сүкүт қилип кәлгән. Илгири сабиқ америка ташқи ишлар министири помпео оттуа асия җумһурийәтлирини зиярәт қилип, қазақистанда қазақ лагер шаһитлири билән учрашқан, шундақла қазақистан һөкүмитини хитайниң уйғур районидики дәпсәндичиликигә сүкүт қилмаслиққа чақирған болсиму, әмма қазақистан һөкүмити һечқачан ашкара позитсийә билдүрүп бақмиғаниди.