Ataqliq qazaq diniy zatliridin baqitxan mirzan xitay jaza lagérida wapat bolghan

Xitay hökümiti teripidin 2018-yili tutqun qilinip 14 yilliq qamaqqa höküm qilin'ghan ataqliq qazaq diniy zatliridin baqitxan mirzan 9-mart küni xitay jaza lagérida wapat bolghan. “Azadliq radiyosi” ning xewer qilishiche, baqitqan mirzanning qazaqistanda turushluq qérindishi almaxan mirzan baqitxan mirzanning 9-mart küni jaza lagirida wapat bolghanliqini élan qilghan. Almaxan mirzanning éytishiche, u wapat bolushtin burun baqitxan mirzanning Uyghur rayoni we qazaqistandiki uruq-tughqanliri xitay da'iriliridin uning salametlik ‍ehwalini közde tutup qoyup bérishni telep qilghan bolsimu, lékin bu telep ret qilin'ghan.

Almaxan mirzan nechche yildin buyan xitayning astanadiki bash elchixanisi we uning almutadiki konsulxanisi aldida naraziliq namayishi qilip, xitay lagérliridiki uruq-tughqanlirining qoyup bérilishini telep qilip kelgen erzdarlarning biri bolghan. Xitay hökümiti 2017-yili bashlighan chong tutqunda Uyghurlarni keng kölemlik tutqun qilipla qalmay, xéli köp sandiki qazaq puqralirinimu ‍oxshash sewebler bilen tutqun qilip, lagérlargha qamighan yaki qamaq jazalirigha höküm qilghan.

Qazaqistan hökümiti lagérdiki bir qisim qazaq puqralirini qutuldurup chiqqan bolsimu, lékin xitayning rayondiki Uyghur, qazaq we bashqa türkiy xelqlirige qaratqan keng kölemlik basturushigha qarita asasen süküt qilip kelgen. Ilgiri sabiq amérika tashqi ishlar ministiri pompé'o ottu'a asiya jumhuriyetlirini ziyaret qilip, qazaqistanda qazaq lagér shahitliri bilen uchrashqan, shundaqla qazaqistan hökümitini xitayning Uyghur rayonidiki depsendichilikige süküt qilmasliqqa chaqirghan bolsimu, emma qazaqistan hökümiti héchqachan ashkara pozitsiye bildürüp baqmighanidi.