Xitay hökümiti Uyghur élidiki ma'arip sahesini mutleq qamal qilishqa teyyarlanmaqta

Muxbirimiz irade
2021-01-14
Share

Uyghur aptonom rayonluq da'iriler yéqinda "Yéngi dewrdiki ma'aripni nazaret qilip bashqurush tüzülmisini islah qilishni chongqurlashturushni yolgha qoyush pilani" ni élan qilghan hemde buni derhal emeliyleshtürüshni uqturush qilghan.

Xitayning "Shinjang géziti" ning xewer qilishiche, yéngi dewrdiki ma'aripni nazaret qilip bashqurush tüzülmisi boyiche "Ma'aripta idé'ologiyege yétekchilik qilish, shi jinpingche idiye yéteklichikide ching turush, shinjang xizmiti ilmiy muhakime yighinining rohini, bolupmu shi jinpingning muhim sözining rohini ma'arip tereqqiyatida aldinqi orun'gha qoyush" dégenler tekitlen'gen.

Uyghur rayonluq partiye komitéti bash ishxanisi we xelq hökümiti bash ishxanisi teripidin jiddiy chaqirilghan bu yolyoruq yighinida ular Uyghur élidiki "Tüzesh sistémisini kücheytish" heqqide mexsus toxtalghan bolup, bu chet ellerdiki közetküchilerning küchlük diqqitini qozghidi. Uningda mundaq diyilgen:

"Shinjangdiki her derijilik ma'arip nazaretchilik apparatliri nazaret qilish netijisige asasen, nazaret qilinidighan orunlardiki mesililerni qet'iy tüzitishi kérek. Tüzitish jayida yaki waqtida bolmisa, nazaret qilish buyruqi chiqirilip, möhlet ichide tüzitish kérek. Nazaret qilinidighan orun mesilini hel qilishi, etrapliq tüzitishi, tüzitish netijisini ma'arip nazaretchilik orginigha waqtida doklat qilishi, tüzitish ehwalini jem'iyetke élan qilishi kérek"

Uningda yene munular déyilgen: "Tekshürüsh sistémisini mukemmelleshtürüsh kérek. Shinjangdiki her derijilik ma'arip nazaretchilik apparatliri ma'arip nazaretchilikini tekshürüsh sistémisini qattiq yolgha qoyup, memuriy rayonlardiki nazaret qilinidighan ishlargha "Ötkenkilerge qayat qarap chiqish" méxanizmini ornitip, yuqiri we munasip ma'arip nazaretchilik apparatlirining nazaritide bayqalghan mesililerni tüzitishi we tüzütüsh jeryanlirini waqtida tekshürüshi kérek."

Chet ellerdiki közetküchiler bu ma'arip bashqurush pilanidiki mezmunlarning xitayning Uyghur ma'aripini mutleq qamal astigha alidighanliqidin dérek béridighanliqini éytti. Ular xitay hökümitining Uyghur élidiki ma'arip sahesidiki nazaretchilik ishlirida ishlargha "Ötkenkilerge qayat qarap chiqish" méxanizmini tekitlishi bu sahede aldimizdiki künlerde yene nurghun kishilerning herxil bahaniler bilen so'al-soraq we tutqun'gha uchraydighanliqining bishariti bolushi mumkin, deydu.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet