Uyghur diyarida yéqinqi 3 yil ichide 16 mingdek meschid chéqip tashlan'ghan we buzghunchiliqqa uchrighan

Muxbirimiz erkin
2020-09-25
Share

Awstraliye istiratégiyelik siyaset inistituti 25-séntebir Uyghurlar heqqide yene doklat élan qilip, xitay da'irilirining Uyghur diyarida yéqinqi 3 yil ichide 16 mingdek meschidni chéqip tashlighanliqi we buzghanliqini bildürdi. Doklatta tekitlishiche, 16 mingdek meschid ichide 8500 meschid pütünley chéqip tashlan'ghan. Bu mezkur inistitutning yéqinqi 3 kün ichide élan qilghan Uyghurlar heqqidiki 2-doklati. Mezkur inistitut 3 kün awwal Uyghur diyaridiki lagérlar heqqide doklat élan qilip, rayondiki 360 lagérni éniqlap chiqqan. Ular sün'iy hemra süretlirini analiz qilip, rayondiki lagérlarning ötken bir yilda dawamliq kéngeygenlikini élan qilghan idi.

Mezkur organning 25-séntebir küni élan qilin'ghan doklatida rayonda qep qalghan meschidlerning 15, 500 ge yetmeydighanliqi, nurghun meschidlerning qubbe we munarlirining élip tashlan'ghanliqi ilgiri sürülgen. Doklatta yene rayondiki mazar, qebristanliq, tawabgahlarni öz ichige alghan muqeddes jaylarning 3 din birining tüzliwétilgenlikini bildürgen. Mezkur doklattidiki sanliq melumatlar kishilik hoquq teshkilatlirining ilgiri élan qilghan sanliq melumatlirigha yéqin kélidken.

Uyghur kishilik hoquq qurulushi ötken yili élan qilghan bu heqtiki doklatida, rayondiki 10 mingdin 15 mingghiche bolghan meschid we diniy sorunlarning chéqip tashlan'ghanliqi yaki buzghunchiliqqa uchrighanliqini ilgiri sürgen. Awstraliye istiratégiyelik siyaset inistitutining doklatida tekitlishiche, nöwette Uyghur diyaridiki musulman diniy sorunlirining sani xitayning "Medeniyet inqilabi" din buyanqi eng töwen chekke chüshüp qalghan. Xitay tashqiy ishlar ministirliqining bayanatchisi wang wénbin téxi étken hepte Uyghur diyarida 24 ming meschid barliqini ilgiri sürgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.