Уйғур район даирилири “шинҗаңға алақидар мәхпийәтликни сақлаш хизмитини” күчәйтишни тәкитлигән

Уйғур районлуқ партийә комитети даимий комитети 4-апрел күни йиғин чақирип, уйғур елигә алақидар мәсилиләрдә мәхпийәтликни сақлашни тәкитлигән.

Хитайниң тәңритағ торида берилгән хәвәрдә дейилишичә, йиғинда хитай рәиси ши җинпиң вә партийә мәркизий комитетиниң мәхпийәтликни сақлаш хизмитигә алақидар орунлаштурма тәләплири йәткүзүлгән вә аптоном районниң мәхпийәтликни сақлаш хизмитигә алақидар һөҗҗәтлири муһакимә қилинған.

Уйғур районлуқ парткомниң секретари машиңруй йиғинда мунуларни тәкитлигән:

“омумий дөләт хәвпсизлики қаришини қәтий изчиллаштуруп, шинҗаңға алақидар мәхпийәтликни сақлаш хизмитиниң муһим әһмийитини чоңқур тонуп, мәхпийәтликни қанун бойичә идарә қилишни күчәйтиш керәк, мәхпийәтликни сақлаш хизмити мәсулийәт түзүмидин ибарәт бу һалқилиқ нуқтини чиң тутуп, һәрқайси орунларниң қанун-бәлгилимә бойичә адәмни яхши башқуруши, мәхпийәтликни яхши башқуруши, торни яхши башқурушиға һәйдәкчилик қилиш керәк. Заманиви пән-техника васитисидин пайдилинип мәхпийәтликни сақлаш хизмитиниң үнүмини өстүрүшкә әһмийәт бериш керәк”

Хитай һөкүмити йеқиндин буян уйғурларға қаритиватқан ирқий қирғинчилиқи вә инсанийәткә қарши җинайәтлирини рәт қилидиған тәшвиқатлирини күчәйтиш билән биргә, районниң ишики кәң очуқ, дегән тәшвиқатини күчәйтиватқаниди. Униң бундақ мәзгилдә мәхпийәтликни сақлашни тәкитлиши диққәт қозғиди.

Уйғур район даирилири 2022-йили хәлқараниң бесими билән б д т кишилик һоқуқ алий комиссари мишәл бачелит уйғур елини зиярәт қилмақчи болғандинму мәхпийәтликни сақлаш һәққидә аһалиләрни тәнбиһлигәнлики ашкариланғаниди. Әйни чағда радийомиз даириләрниң асасий қатламда “дөләт мәхпийәтликини сақлаштики 10 ни қилмаслиқ” намида бир уқтуруш тарқатқанлиқини игилигән.