Тарим нефитлики хитайниң шәрқидики 400 милйон аһалини тәбиий газ билән тәминлимәктә

Мухбиримиз әркин
2021-01-08
Share

Хитайниң "җуңго нефит ширкити" гә қарашлиқ тарим нефитлики "ғәрбниң газини шәрққә йөткәш турубиси" арқилиқ хитайниң шәрқигә җайлашқан 120 дәк чоң-кичик шәһәрдики 400 милйон аһалә вә 3000 карханини тәбиий газ билән тәминлимәктикән. Шинхуа агентлиқиниң 7-январ ашкарилишичә, мәзкур туруба йолиниң 2020-йилиға кәлгәндә газ тошуш омумий миқдари 270 милярд күп метирдин ешип кәткән. Хәвәрдә мәзкур туруба йолиниң һәр күни 95 милйон күп метир газ тошуйдиғанлиқи билдүрүлгән.

Шинхуа агентлиқиниң ейтишичә, бу тәбиий газ тарим нефитликиниң йеңи мәһәллә, кара-2, дина-2 қатарлиқ газлиқлиридин йоллинидикән. Хитайниң "ғәрбниң газини шәрққә йөткәш" турубиси 2004-йили қурулған болуп, дәсләпки мәзгилдә йилиға 351 милйон күп метир газ йолланған, бара-бара көпийип йилиға 25 милярд күп метирдин артуқ йоллайдиған сәвийәгә йәткән. Әйни чағда бу қурулуш уйғур тәшкилатлириниң қаттиқ қарши турушқа учриған болуп, улар бу қурулушниң йәрлик хәлққә пайда елип кәлмәйла қалмай, униң муһитни вәйран қилидиғанлиқи, уйғурларниң паалийәт бошлуқи техиму тарийидиғанлиқини агаһландурған иди.

Көзәткүчилириниң қәйт қилишичә, гәрчә тарим нефитлики 400 милйон хитай аһалисини газ билән тәминлисиму, лекин буниңдин газ чиқиватқан җайлардики уйғурлар пайдилиналмайдикән. Улар бу райондики уйғурларниң һазирға қәдәр йеқилғуда қийнилидиғанлиқини билдүрмәктә. Шинхуа агентлиқиниң ашкарилишичә, 3000 километир узунлуқтики туруба йолиниң уйғур елидики асаслиқ қисми биңтуән җайлашқан 41 наһийә, шәһәр, 21 йеза игилик мәйданидин өтидикән. Хәвәрдә, җәнубтики 4 йерим милйон аһалиниң буниңдин мәнпәәтлинидиғанлиқи ейтилған, лекин буниң ичидә йәрлик хәлқниң қанчә пирсәнтни игиләйдиғанлиқи тилға елинмиған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт