Хитай даирилири уйғурларниң паспорт вә кимликидики исим-фамилисини тәртипкә салидикән

Мухбиримиз әркин
2016-04-01
Share

Хитай һөкүмити бу йил уйғурларниң паспорт вә кимлик гуваһнамисидики исим фамилисини тәртипкә селип, униң йезилиши билән оқулушини, хитайчиси билән уйғурчисини бирликкә кәлтүридиғанлиқини билдүргән.

"асия киндики" гезитиниң илгири сүрүшичә, бу хитай һөкүмити бу йил уйғур аптоном районида әмәлийләштүридиған 20 түрлүк конкрет тәдбирниң бир қисмикән. Хәвәрдә, уйғурларниң паспорт, кимлик қатарлиқ гуваһнамилиридә, исим-фамилиси аһаңдаш болсиму, йезилиши пәрқлиқ болуш, исим-фамилисини артуқ яки кәмтүк йезиш, фамилә билән исимниң орнини алмаштуруп қоюш, исим-фамилисини изчил бир хил хәт билән язмаслиқ қатарлиқ әһваллар һәр милләт аммисиға нурғун қулайсизлиқларни елип кәлгәнликини билдүргән.

Хитай җ х даирилириниң уйғурларға паспорт ишлигәндә уларниң исми билән фамилисини алмаштуруп, фамилә орниға исмини йезиш, тәләппузини хитайчиға өзгәртиш әһвали уйғурларниң изчил наразилиқини қозғап кәлгән.

Уйғур паалийәтчиләр, хитай даирилирини уйғурларниң исим-фамилисини тоғра йезиш қаидисигә бузғунчилиқ қилиш билән әйиблигән иди. "асия киндики" гезитиниң хәвиридә қәйт қилишичә, даириләр бу йил банка, иҗтимаий параванлиқ, давалиниш қатарлиқ саһәләрдә өлчәмни бирликкә кәлтүрүп, паспорт вә 2‏-әвлад кимликини һәқсиз алмаштуруп беридикән.

Уйғур аптоном районлуқ партком йеқинда "милләтләр иттипақлиқи йили" сәпәрвәрлик йиғини чақиртип, 20 түрлүк тәдбир елан қилған. Уйғурларға йолға қоюлған "йешил карт" түзүмини бикар қилиш шу тәдбирләрниң бири иди.

Әмма уйғур паалийәтчилириниң қәйт қилишичә, бу тәдбирләр вәзийәтни бир мәзгиллик контрол қилишқа ярайдиған тактикилиқ тәдбирләр болуп, у, уйғурларниң сиясий һоқуқиға даир негизлик мәсилини һәл қилмайду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт