Ili oblastliq partkom ghuljidiki qamalda puqralarning achliqtin ‍ölgenlikini inkar qildi

Yéqinqi 40 kündin buyan ghuljida yéngi tipliq tajsiman wirusi yuqumigha qarshi qamal yürgüzüp, puqralarning acharchiliqta qélishi, ‍ölüshi we rohiy buzghunchiliqqa uchrishini keltürüp chiqirish bilen eyiblinip kelgen ili oblastliq hökümet 9-séntebir axbarat yighini ötküzüp, özlirining ghuljida yolgha qoyghan karantin tedbirlini aqlighan. Shundaqla karantin jeryanida kishilerning achliqtin ‍ölgenlikini ret qilip, buning saxta uchur ikenliki, bu uchurni tarqatquchining qattiq jazalinidighanliqini élan qilghan.

Axbarat yighinida ili qazaq aptonom oblastliq partkomning mu'awin sékrétari, oblastliq hökümetning bashliqi yérshat tursunbay, karantin tedbirlirini aqlash bilen birge, ghulja puqralirining xitay ijtima'iy taratquliridiki karantin tedbirlirige, acharchiliq we hökümet xadimlirining qopal hem kemsitish xaraktérlik mu'amilisige bolghan shikayetlirige jawab bergen.

Bu qétimqi axbarat yighini xitay hökümiti ghuljida yéngi tipliq tajsiman wirusi yuqumini bahane qilip, omumiyüzlük qamal yürgüzgen'ge 40 kün bolghan, rayondin kéliwatqan uchurlar chet'eldiki Uyghurlarda xitay Uyghurlarni ilgirilep basturushta yuqumni bahane qilip qolliniwatamdu, dégen endishe qozghap, amérika, türkiye qatarliq döletlerde karantin'gha qarshi naraziliq namayishliri yüz bergen bir waqitta ötküzülgen.

Axbarat yighinida yérshat tursunbay “Xitay géziti” muxbirining ghuljida bir yashan'ghan kishining ‍achliqtin ‍ölgenliki heqqidiki xewerlerning rast-yalghanliqi heqqidiki so'aligha jawab bergende, bu xewerning “Emeliyetke uyghun emesliki, yaman gherezlik kishiler toqup chiqarghan yalghanchiliq” ikenlikini ilgiri sürgen.

Uning tekitlishiche, nöwette alaqidar tarmaqlar weqeni “Qattiq bir terep qilmaqta” iken. U puqralarning acharchiliqtin ölgenlikini inkar qilghan bolsimu, biraq radiyomiz ghuljida qamal yolgha qoyulghandin buyan 14 ademning achliq we dorisi yétishmesliktin ‍ölgenliki, ‍ölgenlerdin 3 kishining kimlikini delilligenidi.