Хитайниң һөҗҗәтлик филимда хитайдин қачқан уйғурлар вә бирқанчә қетимлиқ қаршилиқ һәрикәтлири ашкариланди

Хитай мәркизи телевизийә истансиси 20-январ күни 2014-йили хитай чеграсидин вийетнам, тайланд, малайшия қатарлиқ шәрқий җәнуби асия дөләтлиригә қачқан уйғурлар һәққидә мәхсус һөҗҗәтлик филим тарқатти. Бу һөҗҗәтлик филимда һазирғичә хәлқараға ашкариланмиған чеградин қечиш вәқәлири, тутқун қилинған уйғурлар сани вә уйғур елида йүз бәргән 29-апрел хотән қарақаш вәқәси, 5-ноябир хотән гума вәқәси қатарлиқ бирқанчә қетимлиқ қаршилиқ һәрикәтлири һәққидики йеңи учурлар ашкариланди.

Һөҗҗәтлик филимдин ашкарилинишичә, "2014-йили хитайниң гуаңши, йүннән қатарлиқ өлкилиридики вийетнам, тайланд қатарлиқ шәрқий җәнуби асия әллиригә өтидиған чегралирида 262 қетим чеградин қечиш вәқәси йүз бәргән. Чеградин қачқан уйғурлар сани 852 гә йәткән. 352 Адәм чеградин қечиш җәрянида тутқун қилинған яки вийетнам қатарлиқ дөләтләр тәрипидин хитайға қайтуруп берилгән. Филимда хитай чегра қаравуллири тәрипидин етиветилгән уйғурлар вә чеграда тутқун қилинған уйғурлар ичидә хитай түрмилиридә өлгәнләрниң конкрет сани тилға елинмиған.

Даириләр һөҗҗәтлик филимда йәнә, чеградин қачқан уйғурларниң қечиш мәқсити һәққидә тохтилип, уларниң арисида чәтәлләрдики аталмиш "исламий террорлуқ тәшкилатлири" ниң тәшәббуси билән "һиҗрәт" үчүн маңған уйғурлар, уларниң аяллири вә балилириму барлиқини тилға алған, әмма бу уйғурларниң немә сәвәбтин чәтәлләргә қечиш йолини таллиғанлиқи һәққидә тохталмиған.

Чәтәлләрдики уйғур тәшкилатлири вә хәлқара кишилик һоқуқ тәшкилатлири болса, хитай чеграсини бузуп қечишқа мәҗбур болған уйғурларниң диний вә миллий кимлик җәһәттә хитай һөкүмитиниң бастурушиға учраватқанлиқи үчүн қутулуш йоли издәп қечишқа мәҗбур болған уйғур мусапирлири икәнликини тәкитлимәктә.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар