Рамизан мәзгилидә йәкәндә өткүзүлгән мәшрәп диний етиқад бузғунчилиқи дәп әйибләнди

Мухбиримиз меһрибан
2017-06-20
Share

Хитай таратқулиридин "шинҗаң гезити" ниң 20-июндики санида 11-июн йәкшәнбә күни чүш мәзгилидә йәкән базирида чоң типтики муқам-мәшрәп паалийити өткүзүлгәнлики хәвәр қилинди.

Хәвәрдә тилға елинишичә, 60-70 яшлардики мойсипитларниму өз ичигә алған нәччә миң уйғур йәкшәнбилик базар да муқам-мәшрәп паалийити өткүзгән. Чүш мәзгилидики йәкшәнбилик базарда мевә-чевә, кавап-аш ләңпуң, муздәк су-доғап сетиватқан баққалларниң авази арисида мәйданға топланған адәмләр муқам ейтип усул ойниған. Мухбир баянида шу күни базарда мәшрәп паалийитигә қатнашқан уйғурлар өзлириниң чиң чүш мәзгилидә ичкән муздәк су-доғап вә йегән мевилиридин чәксиз һузурланғанлиқини билдүрүшкәнликини алаһидә тилға алған.

Ислам диниға етиқад қилидиған уйғурлар зич олтурақлашқан йәкән наһийисидә, мусулманлар бир айлиқ роза тутуватқан рамизан мәзгилидә бу хил чоң типтики аммиви сәнәт паалийитиниң уюштурулуши чәтәлләрдики уйғур тәшкилатлири вә паалийәтчилириниң җиддий диққитини қозғап әйибләшкә учриди.

Дуня уйғур қурултийиниң диний ишлар мудири, диний өлима турғунҗан алавудун әпәндиниң қаришичә, рамизан мәзгилидә муқам-мәшрәп өткүзүш қилмиши ислам диниға етиқад қилидиған уйғурларниң диний етиқади вә миллий ғуруриға қилинған еғир һақарәт. Турғунҗан әпәнди дуня җамаәтчиликини, болупму мусулманларни уйғурлар учраватқан диний бастурулушқа җиддий диққәт қилишқа вә мусулманларниң етиқадиға қилиниватқан бу хил бузғунчилиқ қилмишлирини тосушқа чақирип мундақ деди: "пүтүн дуня мусулманлири ихлас билән роза тутуватқан улуғ рамизан ейида, йәкәндә уйғурлар мәҗбурий нахша ейтишқа, усул ойнашқа селиниватиду. Мәҗбурий су ичкүзүлүп розиси бузулуватиду. Хәлқара җәмийәт, болупму дуня мусулманлири бу әһвалларға җиддий инкас қайтуруши вә хитай билән болған дипломатик мунасивитидә уйғурларниң диний етиқади бастурулуватқан реал әһвалларни оттуриға қоюп, әйиблиши зөрүр!"

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт