Ramizan mezgilide yekende ötküzülgen meshrep diniy étiqad buzghunchiliqi dep eyiblendi

Xitay taratquliridin “Shinjang géziti” ning 20-iyundiki sanida 11-iyun yekshenbe küni chüsh mezgilide yeken bazirida chong tiptiki muqam-meshrep pa'aliyiti ötküzülgenliki xewer qilindi.

Xewerde tilgha élinishiche, 60-70 yashlardiki moysipitlarnimu öz ichige alghan nechche ming Uyghur yekshenbilik bazar da muqam-meshrep pa'aliyiti ötküzgen. Chüsh mezgilidiki yekshenbilik bazarda méwe-chéwe, kawap-ash lengpung, muzdek su-doghap sétiwatqan baqqallarning awazi arisida meydan'gha toplan'ghan ademler muqam éytip usul oynighan. Muxbir bayanida shu küni bazarda meshrep pa'aliyitige qatnashqan Uyghurlar özlirining ching chüsh mezgilide ichken muzdek su-doghap we yégen méwiliridin cheksiz huzurlan'ghanliqini bildürüshkenlikini alahide tilgha alghan.

Islam dinigha étiqad qilidighan Uyghurlar zich olturaqlashqan yeken nahiyiside, musulmanlar bir ayliq roza tutuwatqan ramizan mezgilide bu xil chong tiptiki ammiwi sen'et pa'aliyitining uyushturulushi chet'ellerdiki Uyghur teshkilatliri we pa'aliyetchilirining jiddiy diqqitini qozghap eyibleshke uchridi.

Dunya Uyghur qurultiyining diniy ishlar mudiri, diniy ölima turghunjan alawudun ependining qarishiche, ramizan mezgilide muqam-meshrep ötküzüsh qilmishi islam dinigha étiqad qilidighan Uyghurlarning diniy étiqadi we milliy ghururigha qilin'ghan éghir haqaret. Turghunjan ependi dunya jama'etchilikini, bolupmu musulmanlarni Uyghurlar uchrawatqan diniy basturulushqa jiddiy diqqet qilishqa we musulmanlarning étiqadigha qiliniwatqan bu xil buzghunchiliq qilmishlirini tosushqa chaqirip mundaq dédi: “Pütün dunya musulmanliri ixlas bilen roza tutuwatqan ulugh ramizan éyida, yekende Uyghurlar mejburiy naxsha éytishqa, usul oynashqa séliniwatidu. Mejburiy su ichküzülüp rozisi buzuluwatidu. Xelq'ara jem'iyet, bolupmu dunya musulmanliri bu ehwallargha jiddiy inkas qayturushi we xitay bilen bolghan diplomatik munasiwitide Uyghurlarning diniy étiqadi basturuluwatqan ré'al ehwallarni otturigha qoyup, eyiblishi zörür!”