Уйғур районидики сақчи, сот орунлири вәзипини толуқ орундашта хитай бойичә биринчи болған

“хитай хәвәрлири тори” ниң 25-март күнидики хәвиригә қариғанда, “шинҗаң җамаәт хәвпсизлик органлири” 2021-йил қатиллиқ делолирини паш қилишни 100 пирсәнткә йәткүзүп, хитай бойичә биринчи болған.

Хәвәрдә ейтилишичә, “шинҗаң җ х назарити” йеқинқи йиллардин мунасивәтлик қаидә, механизмларни синақ тәриқисидә иҗра қилған болуп, мутәхәссисләр гурупписи тәшкилләш, зор қатиллиқ вәқәлирини әтраплиқ муһакимә қилиш, йоқап кәткәнләрниң зиянкәшликкә учришиниң алдини елиш қатарлиқ тәдбирләрни қолланған. Җ х органлири “бир делоға бир архип турғузуш” өлчимини йолға қоюп, дело тәпсилатини рәтләш, өтмүш материяллирини толуқ топлаш, гуваһчилар билән қайта көрүшүш, намсиз җәсәтләрниң, йоқап кәткән яки зиянкәшликкә учриғучиларниң учурлирини толуқ рәтләш арқилиқ дело паш қилишқа керәклик учур мәнбәсини шәкилләндүргән. “йүз йиллиқ испат” нишанини тикләп, чоңқур тәкшүрүш арқилиқ муһим йип учини игиләп, тарихқа айлинип кәткән бир түркүм кона қатиллиқ делолириниму паш қилған.

Униңдин башқа, аптоном районлуқ юқири сот мәһкимиси 23-март күни ахбарат йиғини ечип, 2021-йилдин буян һәр қайси сот мәһкимилириниң 17 миң 600 һәқ-тәләп дәвасини бир тәрәп қилғанлиқини елан қилған. Буниң ичидә чоң-кичик карханилар, дөләт карханилири оттурисидики пул-муамилә маҗирасиға аит 4000 һәқ-тәләп дәваси бир тәрәп қилинған.

Көзәтчиләрниң билдүрүшичә, хитайниң “кона қатиллиқ делолирини бир тәрәп қилдуқ” дегинидә нурғун гуманлиқ ишарәтләр бар. Хитай һөкүмити 5 йилдин бери лагерларда из-дерәксиз йоқитивәткән инсанларму әмәлийәттә намсиз җәсәтләр болуп, буниң қатиллири кимләр, хитай һөкүмити буниңму архипини турғузуп чиқаламду? сот мәһкимиси елан қилған һәқ-тәләп дәвалири ичидә пәқәт карханиларниң пул-муамилә маҗирасидин башқа, соралмиған яки наһәқ соралған миңлиған дәвалар бар, сотчилар халиғанчә һөкүм чиқириду, һәтта сотлимайла кесиду, әмәлийәттә хитайниң уйғур районидики бастуруш сияситини иҗра қилиду. Һечқандақ қануний тәртип болмиған әһвалда әлвәттә бу райондики сақчи билән сотчиниң иҗраат сүрити хитай бойичә әң тез болиду.