Uyghur aptonom rayonluq siyasiy kéngesh yighin ötküzüp, adwukatlarni kücheytishni muzakire qilghan

Muxbirimiz erkin
2021-04-23
Share

Uyghur aptonom rayonluq siyasiy meslihet kéngishi 21-aprél yighin ötküzüp, "Shinjangda adwokatlar qoshunining qurulushini kücheytish", "Adwokatlarning qanun mulazimitige qatnishish méxanizmini mukemmelleshtürüsh" mesilisini muzakire qilghan. Adwokatlarning rolini kücheytish toghrisidiki bu yighinning xitay hökümiti Uyghurlargha "Irqiy qirghinchiliq" qilish, milyonlighan kishini qanunsiz lagér we türmilerge qamash bilen eyiblinip, Uyghur élide musteqil tekshürüsh élip bérish heqqidiki bésimgha duch kelgen mezgilde échilishi diqqet qozghighan.

"Shinjang géziti" ning xewer qilishiche, Uyghur aptonom rayonluq siyasiy kéngeshning re'isi nurlan abdumenjinning riyasetchikide ötküzülgen yighinda, adwokatlarning qanun mulazimitige qatnishish xizmet méxanizmini mukemmelleshtürüsh, adwokatlarni terbiyeleshning yéngi yollirini échish, shinjangning ottura asiyadiki döletler bilen bolghan adwokat almashturush hemkarliqini kücheytish, tüzümni mukemmelleshtürüp, adwokatlar qoshunining qurulushini kücheytishni telep qilin'ghan.

Yighinda yene adwokatliq orunlirining chet jaylarda we chégra nahiyelerde tarmaq ponkitlirini échish, qosh tilliq we chet'elge munasiwetlik adwokatlarni terbiyeleshni kücheytish telep qilin'ghan. Xitayning hökümiti 2017-yili bashlan'ghan chong tutqunda milyonlighan Uyghurni lagérlargha qamap, ularning ichidiki nurghun kishilerni adwokatsiz, kishilerge özini aqlash hoquqi bermestin késiwetken. Chet'eldiki bezi Uyghur a'ile ezalirining bildürüshiche, bu jeryanda lagérdikilerning iz dérikini qilish üchün adwokat tutushmu mumkin bolmighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet