Уйғурлар диярида “дәря-көлләрни рәткә селиш һәрикити” башланди

Шинхуа агентлиқиниң 27-авғусттики хәвиридә ейтилишичә, уйғурлар диярида бу йилдин башлап үч йиллиқ муддәттики “дәря-көлләрни рәткә селиш һәрикити” башлинидикән. Хәвәрдә бу һәрикәтниң асасий мәқсити дәря-көлләрниң екологийәлик муһитини яхшилаш икәнлики ейтилиду.

Хәвәрдә буниңдин кейинки үч йилда дәря-көлләр бойида қалаймиқан қурулуш қилиш, қалаймиқан йәр қезиш, дәря-көлләргә булғанған суларни маңдуруш дегәндәк қилмишларниң чәклинидиғанлиқи алаһидә тәкитлиниду.

Муһаҗирәттики уйғур паалийәтчиләрдин америка уйғур бирләшмисиниң рәиси елшат һәсән уйғур дияридики су мәсилиси, биңтуәндики мунасивәтлик әһваллар вә биңтуәнниң узун йиллардин буян су мәнбәлирини контрол қилип келиватқанлиқи һәққидә пикир қилип: “уйғурлар миң йиллар тарим вадисиниң екологийәлик муһитини тәбиий һаләттә сақлап қелиш үчүн тиришип кәлгән болса, биңтуәндики хитай көчмәнлириниң көпийиши билән уларниң айиғи тәгкәнла җайда көплигән дәря-еқинлар вә су мәнбәлири қуруп кәткән” деди.

Йәнә бәзи анализчилар хитай һөкүмитиниң “дәря-көлләрни рәткә селиш һәрикити” ни “хитайларниң уйғурлар дияридики барлиқ су мәнбәсигә болған мутләқ контроллуқни ишқа ашуруш урунуши, шуниңдәк уларниң кәлгүсидә техиму зор санда хитай көчмәнлирини йөткәш хизмитигә тәйярлиқ қилиш һәрикити болуши мумкин” дәп қарайдиғанлиқини билдүрди.