Хитай “2021-йиллиқ шинҗаңға ярдәм бериш су иншаати қурулуши хизмәт йиғини” ачқан

Хитай таратқулириниң хәвиридә ейтилишичә, хитай һөкүмити йеқинда “2021-йиллиқ шинҗаңға ярдәм бериш су иншаати қурулуши хизмәт йиғини” ечип, уйғур райониниң су иншаати қурулушиға нуқтилиқ ярдәм беришиниң әң муһим сиясий вәзипә икәнликини оттуриға қойған.

Уйғур аптоном районлуқ парткомниң секритари чен чүәнго бу йиғинда сөз қилип, хитай су ишлири министирлики билән “шинҗаңға ярдәм бериватқан өлкә вә шәһәрләрниң шинҗаңға ярдәм бериши” ниң әң муһим сиясий вәзипә икәнликини, “шинҗаңниң су иншаати қурулушини яхшилаш вә йеңи иншаатларни бәрпа қилишниң шинҗаңниң муқимлиқи вә тәрәққияти үчүн пайдилиқ вәзийәт яритидиғанлиқи” ни тәкитлигән.

Көзәткүчиләрниң билдүрүшичә, уйғур районида су байлиқи чәклик болуп, хитай һөкүмити бу райондики су мәнбәсини қаттиқ контрол қилип, биңтуән мәйданлириға алаһидә етивар берип, йәрлик орунларниң сүйини қисип кәлгән. Хитай йәнә уйғур районидики су мәнбәсини көпәйтип, хитай нопусини көпләп орунлаштуруш үчүн “бохәй деңизиниң сүйини тазилап җуңғар чөлигә башлаш, тибәттики ярлузаңбу дәрясиниң сүйини тәклимакан чөлигә башлаш” дегәндәк пиланларни түзгән болсиму, техи әмәлгә ашуралмай кәлгәниди. Хитайниң бу қетимлиқ йиғини уйғур райониниң кәлгүсидики су иншаати қурулушида сиясий муқимлиқни көзлигән чоң қурулушларниң мәйданға келиши мумкинликини көрситип беридикән.