Xitay “2021-Yilliq shinjanggha yardem bérish su insha'ati qurulushi xizmet yighini” achqan

Xitay taratqulirining xewiride éytilishiche, xitay hökümiti yéqinda “2021-Yilliq shinjanggha yardem bérish su insha'ati qurulushi xizmet yighini” échip, Uyghur rayonining su insha'ati qurulushigha nuqtiliq yardem bérishining eng muhim siyasiy wezipe ikenlikini otturigha qoyghan.

Uyghur aptonom rayonluq partkomning sékritari chén chüen'go bu yighinda söz qilip, xitay su ishliri ministirliki bilen “Shinjanggha yardem bériwatqan ölke we sheherlerning shinjanggha yardem bérishi” ning eng muhim siyasiy wezipe ikenlikini, “Shinjangning su insha'ati qurulushini yaxshilash we yéngi insha'atlarni berpa qilishning shinjangning muqimliqi we tereqqiyati üchün paydiliq weziyet yaritidighanliqi” ni tekitligen.

Közetküchilerning bildürüshiche, Uyghur rayonida su bayliqi cheklik bolup, xitay hökümiti bu rayondiki su menbesini qattiq kontrol qilip, bingtu'en meydanlirigha alahide étiwar bérip, yerlik orunlarning süyini qisip kelgen. Xitay yene Uyghur rayonidiki su menbesini köpeytip, xitay nopusini köplep orunlashturush üchün “Boxey déngizining süyini tazilap jungghar chölige bashlash, tibettiki yarluzangbu deryasining süyini teklimakan chölige bashlash” dégendek pilanlarni tüzgen bolsimu, téxi emelge ashuralmay kelgenidi. Xitayning bu qétimliq yighini Uyghur rayonining kelgüsidiki su insha'ati qurulushida siyasiy muqimliqni közligen chong qurulushlarning meydan'gha kélishi mumkinlikini körsitip béridiken.