Uyghur diyaridiki “Terbiyelesh” merkezlirining dawam qiliwatqanliqi diqqet qozghimaqta

Xitay hökümiti yéqinqi mezgillerde Uyghur diyaridiki “Bextiyarliq we inaq jem'iyet” heqqidiki teshwiqatini izchil kücheytiwatqan bolup, bu hal ularning Uyghur diyaridiki “Kespiy terbiyelesh merkizi” namida échilghan lagérlarning taqalghanliqi heqqidiki bayanatlirigha yandiship kéliwatqanliqi melum. Emma yéqinqi xewerler Uyghur diyaridiki lagér sistémisining izchil dawam qiliwatqanliqini körsetmekte.

Xitay bashqurushidiki “Shinjang géziti” ning 8-awghusttiki xewiride éytilishiche, Uyghur aptonom rayonluq hökümet shu küni échilghan “Ishqa orunlashturushni algha sürüsh” témisidiki yighinda, 2023-yilining aldinqi yérimida “Bir yérim milyon adem qétimliq kespiy terbiyelesh wezipisini 128 pirsentlik ünüm bilen tamamlidi. Buning bilen 1.93 Milyon adem qétimdin köp kespiy terbiyelesh ishqa ashti” dep jakarlighan. Shundaqla bu xildiki “Kespiy terbiyelesh” te türlük maharetlerni öginip chiqqanlarning nöwettiki “Adem bayliqini qézish” telipini qandurushta achquchluq rol oynighanliqini bildürgen.

Xitay kontrolluqidiki “Tengritagh tori” ning 8-awghusttiki tepsiliy xewiride bolsa, “Bu yilning aldinqi yérimida 308 ming kishi yéngidin ishqa orunlashti” déyilgen. Shundaqla buning 2023-yili 460 ming kishini ishqa orunlashturush pilanining bir qismi ikenliki eskertilgen. Uyghur aptonom rayonluq adem küchi bayliqi we ijtima'iy kapalet nazaritining naziri perhat jalal bu heqte ehwal tonushturup, “Ötken yérim yilda biz ishqa orunlashturushni toxtawsiz kücheytip, herqaysi sahelerdiki ishqa orunlashturush körsetküchini yérimidin ashurup orunlashqa tirishtuq” dégen.

Xitay hökümitining Uyghur diyarini asasliq yéza igilik we yénik sana'et ishlepchiqirishi bazisigha aylandurushigha egiship, “Kespiy terbiyelesh merkizi” namidiki lagérlargha qamalghan kishilerning erzan bahaliq emgek küchi süpitide bu bazilarda qurulghan türlük zawut-karxanilargha ishchiliqqa yötkiliwatqanliqi yéqindin buyan köplep melum bolghan idi. Nöwette yüz minglighan kishining “Ishqa orunlashturush” namida herqaysi zawutlargha teqsim qilinishi, shuningdek “Kespiy terbiyelesh” ning dawam qiliwatqanliqi Uyghur diyaridiki qirghinchiliqning hélihem dawamlishiwatqanliqini wasitilik halda eks ettüridu, dep qaralmaqta.