Үрүмчи шәһири җ х тармақлириға 3000 адәм тутуш санлиқ көрсәткүчи чүшүргән

Мухбиримиз әркин
2017-11-02
Елхәт
Пикир
Share
Принт

Үрүмчи шәһәрлик җ х идариси бу һәптә һәр қайси шөбә сақчи идарлириға һөкүмәткә қарши сөз қилған, чәкләнгән чәтәл үн-синлирини көргән уйғур вә қазақлардин 3000 адәмни тутуш санлиқ көрсәткүчи чүшүргән.

Бир қазақ пуқрасиниң чаршәнбә күни радиомизға ашкарилишичә, үрүмчи шәһири тәңритағ районлуқ сақчи идариси бу һәптиниң башлирида шәһәрлик җ х идарисиниң 3000 адәм тутуш һәққидики санлиқ көрвәткүчини тапшурувалған. Мәзкур қазақ пуқраси, бу һәқтики учурни үрүмчи шәһәрлик җ х системисидики бир сақчи тонушидин алғанлиқинини илгири сүргән. Униң баян қилишичә, униң сақчи тонуши үрүмчи шәһәрлик сақчи идарисиниң ички қисимда адәм тутуш көрсәткүчи чүшүрүп, 3000 аәм тутушни тәләп қилғанлиқини билдүргән. У, «бир һәптә ичидә чоқум уйғур вә қазақлардин 3000 адәм тутуш тәләп қилинди,» дегән.

Мәзкур хәвәр үрүмчи шәһәрлик җ х органлири тәрипидин техи дәлилләнмигән болсиму, бирақ уйғур аптоном райониниң бәзи җайлиридики аһалиләр илгири юқириниң чүшүрүп бәргән адәм тутуш көрсәткүчини орунлашта қийниливатқанлиқини билдүргән иди. Хитай даирилириниң уйғур районида һәр қайси җ х тармақлириға адәм тутуш көрсәткүчи чүшүрүп бериши йеңилиқ болмисиму, әмма бу әһвал өткән йилниң ахирлиридин башлап башқичә түс алған.

Даириләр тутқун қилишни кеңәйтип, җәмийәтниң мәлум қатлимини нишанлиқ тутқун қилишқа башлиған. Уйғур районидики йәрлик аһалиләрниң ашкарилишичә, даириләр «йепиқ тәрбийәләш мәркәзлири» ни қуруп, бәзи йеза-кәнтләрдики аһалиниң 40 пирсәнтини «йепиқ тәрбийәләш мәркәзлири» гә әвәтиш һәққидә ағзаки йолйоруқ чүшүргән.

Хитайниң райондики бу хил бастуруш һәрикити кишилик һоқуқ тәшкилатлириниң тәнқидигә учриған иди. Кишилик һоқуқни көзитиш тәшкилати йеқинда баянат елан қилип, хитайни аһалиләрни қалаймиқан тутқун қилишни тохтитишни, «йепиқ тәрбийәләш мнәркәзлири» ни тақашни тәләп қилған.

Пикирләр (0)
Share
Толуқ бәт