Вирус сәвәбидин бир қисим уйғурларниң ички әзалири оғрилиниватқанлиқи алға сүрүлмәктә

Мухбиримиз әзиз
2020-03-10
Елхәт
Пикир
Share
Принт

Хитайдики таҗсиман вирус билән юқумланған бир қисим «тәләйлик» бимарларниң йеқинда ички әза көчүрүш оператсийәси қилдуруш арқилиқ сақийип қалғанлиқи һәққидә хәвәрләр мәлум болғандин кейин бу һәқтә көплигән гуманлиқ соалларму оттуриға чүшти. Болупму өткән һәптә ичкири хитайниң мәлум бир җайидики 59 яшлиқ бир адәмгә «бәш күнлүк күтүш муддити» дин кейин «өлүмгә һөкүм қилинған бир җинайәтчи» ниң өпкиси дәл тоғра кәлгәнлики, мәзкур җинайәтчиниң өз өпкисини «тәқдим» қилишқа рази болғанлиқи һәққидә тохталған австралийәлик обзорчи с. Җ. Верлемән буниңдин әндишә қиливатқанлиқини билдүрди. Шундақла бу қилмишниң лагерлардики уйғур тутқунларниң ички әзалирини оғрилаш қилмиши болуши мумкин, дәп қарайдиғанлиқини тәкитлиди.

Нөвәттә хитай бойичә таҗсиман вирустин юқумланған нурғун сандики юқири дәриҗилик әмәлдарлар вә пулдарлар бар болуп, верлемәнниң пикричә лагердики үч милйон уйғурни «тәйяр олҗа» дейишкә болидикән. Чүнки хитай хәвәрлиридә дохтурханилар үчүн лазимлиқ ички әзалардин өпкә яки бөрәк дегәнләрниң нәччә күндила тепилидиғанлиқи ейтилған. Һалбуки «қаза қилғучилар өзиниң ички әзалирини һәдийә қилишқа рази болуш» шунчә омумлашқан ғәрб дунясида бу хил ички әзаларниң тепилиши үчүн нәччә йиллап күтүшкә тоғра келидикән. Буниң әксичә болған хитайда болса нәччә күндила халиған әзани тапқили болидикән.

Әнглийәдики адвокатлар вә кишилик һоқуқни һимайә қилғучилардин тәшкил тапқан «хитай мунбири» ниң 1-марттики доклатида «мәҗбурий болған ички әзалар оғрилиқи хитайда 20 йилдин буян давам қилмақта. Нөвәттә болса хитайдики ички әзалар еһтияҗи уйғурлар вә фалунгоң муритлирини нишан қилмақта» дейилгән. Шундақла әнглийәдики уйғур дохтур әнвәр тохтиниң бу әһваллар һәққидә көп қетим гуваһлиқ бәргәнликини, өткән бирнәччә йилда пүткүл уйғурларниң барлиқ биологийәлик әвришкилириниң толуқ топлинип болғанлиқини, йәнә келип бәзи хитайларниң «уйғурлар еһтияҗлиқ болғанда дәрһалла өлтүрүлүп уларниң ички әзалири суғурувелиниду» дәп гуваһлиқ бәргәнликини мисал қилиду.

Апторниң қаришичә, хитайда таҗсиман вируси ямраватқан һазирқи мәзгил улардики адәм әзалириға болған еһтияҗ һәссиләп ашқан бир вақитқа тоғра келидикән. Бундақ әһвалда шүбһисизки техиму көп лагер мәһбуслириниң буниңға қурбанлиқ қилинип кетиши еһтималға бәкму йеқин икән.

10-Март күни америка дөләт мәҗлисидә ечилған «хитайда давамлишиватқан ички әзалар оғрилиқиниң испатлири» темисидики муһакимә йиғинидиму дәл мушу хилдики қанунсиз вә мәҗбурий болған оғрилиқ қилмиши асасий тема болди.

Пикирләр (0)
Share
Толуқ бәт