2-May küni Uyghur élida yéngidin 26 neper alametsiz yuqumlan'ghuchi köpeygen

Muxbirimiz irade
2022.05.05
Share on WhatsApp
Share on WhatsApp

Uyghur diyarida xitayning “Wirus yuqumini nölge chüshürüsh” tedbirlirige qarimay, wirus yuqumining yenila jiddiy halette ikenliki melum bolmaqta.

Xitay hökümitining bashqurushidiki “Shinjang sehiye tori” ning 3-maydiki xewiride éytilishiche, 5-ayning 2-küni sa'et 0 din 24 kéche bolghan ariliqta, Uyghur éli (shinjang ishlepchiqirish-qurulush bingtu'enini öz ichige alidu) da yéngidin 26 neper alametsiz yuqumdar köpeygen bolup, ularning hemmisi ürümchining midung rayonida iken.

Shundaq bolghanda, 5-ayning 2-küni sa'et 24 kéche, Uyghur élida késellik ehwali qozghalghan bimar sani 8 neper, alametsiz yuqumlan'ghuchi sani jem'iy165 neperge yetken.

Xitay hökümiti wirus yuqumigha da'ir uchurlarni “Dölet mexpiyetliki” dep qarighachqa, ularning yuqum heqqide élan qiliwatqan reqemliri xelq'ara jam'et teripidin intayin gumanliq dep qarilip kelmekte. Shundaqtimu yuqiriqi yuqumdarlar sani Uyghur aptonom rayonluq da'iriler hazirghiche yuqum heqqide élan qilghan bir qeder zor reqemlerning biri bolup hésablinidu.

Xitay hökümitining “Wirus yuqumini nölge chüshürüsh” tedbiri boyiche shangxey shehirini öz ichige alghan bir qanche chong sheherlerde yolgha qoyuwatqan chékidin ashqan tedbirler, xelq'ara taratqularda zor inkas qozghighan idi.

“Tashqiy siyaset” zhornilining xewer qilishiche, aqsarayning bash tébbiy meslihetchisi antoniy fa'uchi (Anthony Fauci) herqaysi döletlerning yuqum weziyitini bahalap söz qilghanda, xitayning COVID-19 weziyitini “Apet” dep bahalighan. U qamal qilishning choqum éniq nishani bolushi kéreklikini, undaq bolmaydiken, uning ziyandin bashqa nerse ekelmeydighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.