Uyghur diyarida yuqumdarlar dawamliq köpiyiwatqan bolsimu, lékin yuqumning menbesi éniqlanmidi

Uyghur diyarida korona wirusi yuqumdarlirining sani dawamliq éship, mezkur rayon xitaydiki yuqumdar eng köp rayon'gha aylan'ghan bolsimu, lékin xitay hökümiti yuqumning tarqilish menbesi heqqide héchqandaq uchur élan qilip baqmidi. Mezkur mesile chet'el taratqulirining diqqitini qozghighan. “Hindistan waqti” gézitining 31-iyul bergen xewiride, xitay döletlik sehiye komitétining lyawning ölkisidiki daliyen shehiride bayqalghan yuqumning menbesinini élan qilghanliqi, yuqumning bir déngiz mehsulatlar shirkitidin tarqalghanliqi élan qilin'ghan bolsimu, lékin Uyghur diyaridiki yuqumning menbesi heqqide héchnéme démigenliki alahide tekitlen'gen.

Xitay sehiye da'irilirining 31-iyul élan qilishiche, Uyghur diyaridiki yuqumdarlarning sani 30-iyul 526 ge yétip barghan. Da'iriler 30-iyul künining özide 112 neper yuqumdar bayqalghanliqi, ularning 111 nepirining ürümchide, bir nepirining sanjida bayqalghanliqini bildürgen. Uyghur aptonom rayonluq sehiye komitéti aldinqi küni rayonda 96 yéngi yuqumdar bayqalghanliqini élan qilghanidi. 30-Iyul bayqalghan yuqumdarlar aldinqi kündikidin 16 adem artqan.

Rayonda yuqumning kündin-kün'ge éship méngishi chet'ellik Uyghurlarda lagér we mejburi emgek zawutliridiki Uyghurlarning salametlikige bolghan endishini téximu kücheytmekte. Amérikadiki “Erkinlik sariyi” ning 30-iyul radiyomizgha tekitlishiche, bu mesilide “Xelq'ara jem'iyet dunya sehiye teshkilati arqiliq xitaygha bésim ishlitishi kérek” iken. Xitay döletlik sehiye komitéti jüme küni pütün xitay miqyasida 30-iyul 127 neper yuqumdar bayqalghanliqini élan qilghan. Uning tekitlishiche, ularning ichidiki Uyghur diyarida bayqalghan 112 neper yuqumdarning 30 nepiri ilgiri gumanliq yuqumdar, dep di'agnoz qoyulghanlar iken.