Уйғур дияридики вирус юқуминиң төвәнлигәнлики зор гуманға сәвәб болмақта

Мухбиримиз әзиз
2022.09.21
Share on WhatsApp
Share on WhatsApp

Хитай һөкүмити башқурушидики “тәңритағ тори” ниң 20-сентәбирдики хәвиридә ейтилишичә, шу күни йерим кечигә қәдәр һечқандақ йеңи бимар байқалмиған. Йеңидин көпәйгәнләр пәқәт 11 нәпәр аламәтсиз бимарлар болуп асаслиқи үрүмчи, ғулҗа вә корла қатарлиқ җайлардин байқалған.

Хәвәрдә һазирға қәдәр пүткүл уйғур диярида ениқ диагноз қоюлған бимардин икки нәпәр барлиқи ейтилған болуп, бу арқилиқ йеқиндин буян тәкитлиниватқан вирус юқуминиң контрол қилинғанлиқи гәвдиләндүрүлгән. Хитай башқурушидики “шинҗаң гезити” ниң 21-сентәбирдики хәвиридә һазир ғулҗа шәһиридә “үч тохташ” (хизмәт, тиҗарәт вә мулазимәт тохташ) арқилиқ башқурулуватқан районлар саниниң тездин азийиватқанлиқини алаһидә гәвдиләндүрүш арқилиқ юқумниң контроллуққа елинғанлиқи васитилик һалда алға сүрүлгән. Шу қатарда көплигән микро районларниң ‍ечиветилгәнлики, нормал һаятниң әслигә келиватқанлиқи, шундақла юқум әһвалиниң һазир турпан, ақсу қатарлиқ башқа җайлардиму контроллуққа елинғанлиқи әскәртилгән.

Һалбуки иҗтимаий таратқуларда кәң тарқиливатқан қисқа филимлар уйғур дияридики юқум контроли баһанисидә қаттиқ қоллуқ билән иҗра қилинған қамал тәдбирлириниң еғир ачарчилиққа сәвәбкар болғанлиқини, шуниңдәк бу җәрянда нурғун кишиниң ачлиқтин өлүп кәткәнликини көрситиватқан болуп, қамалниң һелиһәм давам қиливатқанлиқини биваситә тәстиқлайду. Һөкүмәт даирилириниң хитай компартийәсиниң 20-қурултийи ечилишқичә болған мәзгилдә “омумий вәзийәтниң муқимлиқиға кепиллик қилиш” һәққидики чақириқлири болса нөвәттики қамал тәдбирлириниң аз дегәндиму өктәбир ейиниң ‍оттурилириғичә давам қилишидин бешарәт, дәп қариливатқанлиқи мәлум.

Йеқинқи мәзгилләрдә хитай һөкүмитиниң “юқумни нөлгә чүшүрүш” шо‍ари астида рәһимсизлик билән иҗра болған қамал қилиш чарилириниң қандақ еғир паҗиәләрни кәлтүрүп чиқарғанлиқи чәтәлләрдики даңлиқ ахбарат васитилиридә көпләп хәвәр қилинған һәмдә хитай һөкүмитиниң бу хилдики “юқум тәдбирлири” ни бир қисим уйғур паалийәтчиләр “ачарчилиқ қирғинчилиқи” дәп атиғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.