Qorghas shehiride tarqalghan yuqumda yene bir yéngi yuqumdar bayqalghan

Muxbirimiz erkin
2021-10-05
Share

Uyghur élining qorghas shehiride korona wirusi qayta tarqilip, ikki yuqumdar bayqalghandin kéyin, 5-öktebir yene bir yuqumdar bayqalghan. Xitay da'irilirining élan qilishiche, yéngi bayqalghan yuqumdar aldinqi küni bayqalghan ikki yuqumdardin birining yoldishi iken. Buning bilen qorghasta yuqumdarlarning sani 3 ke köpeygen. Yéngi bayqalghan yuqumdar 3-öktebir karantin'gha ‍élin'ghan bolup, da'iriler 5-‍öktebir uning korona wirusida yuqumlan'ghanliqini muqimlashturghan.

"Xitay xewerliri" torining éytishiche, nöwette qorghas shehiri 3-qétimliq korona wirusi beden tekshürüshini bashlighan.

Da'iriler aldinqi küni ikki kishide wirus bayqalghandin kéyin pütün ghuljini karantin'gha élip, ayropilan, tömüryol, aptobus qatnishini toxtatqan, yollarni qamal qilghan. Xitay ‍ijtima'iy taratquliridiki uchurlarda, ghuljida puqralarning öylirige qayta nezerbend qilin'ghanliqi, kishilerning sirtqa chiqishi cheklen'genliki, bu déhqanlarning küzlük yighimi we namratlarning turmushigha éghir tesir körsetkenliki tekitlen'genidi.

Xitay taratqulirining éytishiche, qorghasta bayqalghan yuqum xitay merkizi sehiye da'iriliriningmu diqqitini qozghighan. Qorghastiki yuqumning néme ‍üchün merkizi sehiye da'irilirini jiddiyleshtürüwetkenliki melum emes.

Uyghur aptonom rayonluq hökümet torining xewer qilishiche, xitay döletlik sehiye ministirliqi 4-öktebir qorghasqa yuqumni bir terep qilishqa yétekchilik qilish xizmet guruppisi ewetken. Buning aldida Uyghur aptonom rayonluq partkom sin yighini chaqirip, yuqum rayonidiki "Muhim jaylargha we nuqtiliq toplargha qarita keskin aldini élish tedbirlirini yolgha qoyush" ni buyrughanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet