Хитай уйғур елиниң җәнубида 4 милйон мо йәрни қайтидин тәқсим қилмақчи

Мухбиримиз шөһрәт һошур
2018-02-28
Share

Хитай һөкүмәт таратқулири бүгүн йәнә хәвәр берип, уйғур елиниң җәнубидики 3 вилайәт бир област миқясида җәмий 4 милйон 47 миң мо йәрни йиғивелип қайтидин тәқсимләйдиғанлиқини билдүрди.

Иккинчи қетимлиқ йәр ислаһати түсини еливатқан бу һәрикәт пилани мәзкур хәвәрдә "шу җайлардики йәр аз, адәм көп болуш мәсилисини һәл қилиш" вә "намратлиқниң йилтизиға палта уруш" дәп тәсвирләнгән.

Хәвәрдә йәнә қәшқәр шәһиригә қарашлиқ йеңиөстәң йеза һәрәмбағ кәнтидики хизмәт гурупписиниң мәсули ло йиңҗаңниң сөзлири нәқил елинип, "коллектип иқтисадини күчләндүрүш вә намрат аилиләрниң илгирилишигә түрткә болуш" үчүн һәр мо йәрниң һөддигә берилиш һәққиниң илгирики 150-200 йүәндин, һазирқи 300-420 йүәнгә өстүрүлгәнлики баян қилинған.

Хәвәрдә гәрчә бу тәқсиматниң мәзкур райондики 756700 намрат нопусниң мәнпәәтини көздә тутуватқанлиқи тәкитләнгән болсиму, әмма бу һәқтики тәҗрибә-савақлар муһаҗирәттики уйғур көзәткүчиләрни әндишигә салмақта. Уларниң қаришичә, 1950‏-йилларда елип берилған "йәр ислаһати" да терилғу йәрләр намда байларниң қолидин намратларниң илкигә өткән болсиму, маһийәттә йәрлик аһалиләрниң қолидин дөләтниң қолиға, йәни дөләтниң қурғучиси вә игиси болған хитай миллитиниң қолиға өткән иди.

Мәлум болушичә, йеқинқи йиллардин бери уйғур районидики көплигән терилғу йәрләр билән вә боз йәрләр дөләтниң һимайиси сәвәблик хитай көчмәнлириниң қолиға мәркәзләшкәндин башқа, йәнә бәлгилик көләмдики йәрләр шәхсий тиришчанлиқи билән ронақ тапқан бир қисим уйғур тиҗарәтчиләр вә аилиләрниң қолиға өткән иди. Шуңа көзәткүчиләр, хитай даирилириниң бу қетимқи йәр тәқсимати арқилиқ хусуси игиликкә, йәни хитай көчмәнлириниң қолидики байлиққа вә яки аз сандики уйғурларниң қолидики мүлүккә көз тикиватқанлиқини пәрәз қилишмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт