Xitay Uyghur élining jenubida 4 milyon mo yerni qaytidin teqsim qilmaqchi

Muxbirimiz shöhret hoshur
2018.02.28

Xitay hökümet taratquliri bügün yene xewer bérip, Uyghur élining jenubidiki 3 wilayet bir oblast miqyasida jem'iy 4 milyon 47 ming mo yerni yighiwélip qaytidin teqsimleydighanliqini bildürdi.

Ikkinchi qétimliq yer islahati tüsini éliwatqan bu heriket pilani mezkur xewerde “Shu jaylardiki yer az, adem köp bolush mesilisini hel qilish” we “Namratliqning yiltizigha palta urush” dep teswirlen'gen.

Xewerde yene qeshqer shehirige qarashliq yéngi'östeng yéza herembagh kentidiki xizmet guruppisining mes'uli lo yingjangning sözliri neqil élinip, “Kolléktip iqtisadini küchlendürüsh we namrat a'ililerning ilgirilishige türtke bolush” üchün her mo yerning höddige bérilish heqqining ilgiriki 150-200 yüendin, hazirqi 300-420 yüen'ge östürülgenliki bayan qilin'ghan.

Xewerde gerche bu teqsimatning mezkur rayondiki 756700 namrat nopusning menpe'etini közde tutuwatqanliqi tekitlen'gen bolsimu, emma bu heqtiki tejribe-sawaqlar muhajirettiki Uyghur közetküchilerni endishige salmaqta. Ularning qarishiche, 1950‏-yillarda élip bérilghan “Yer islahati” da térilghu yerler namda baylarning qolidin namratlarning ilkige ötken bolsimu, mahiyette yerlik ahalilerning qolidin döletning qoligha, yeni döletning qurghuchisi we igisi bolghan xitay millitining qoligha ötken idi.

Melum bolushiche, yéqinqi yillardin béri Uyghur rayonidiki köpligen térilghu yerler bilen we boz yerler döletning himayisi seweblik xitay köchmenlirining qoligha merkezleshkendin bashqa, yene belgilik kölemdiki yerler shexsiy tirishchanliqi bilen ronaq tapqan bir qisim Uyghur tijaretchiler we a'ililerning qoligha ötken idi. Shunga közetküchiler, xitay da'irilirining bu qétimqi yer teqsimati arqiliq xususi igilikke, yeni xitay köchmenlirining qolidiki bayliqqa we yaki az sandiki Uyghurlarning qolidiki mülükke köz tikiwatqanliqini perez qilishmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.