31-Авғуст күни уйғур елидә йәнә 38 нәпәр йеңи типлиқ таҗсиман вирус юқумдари байқалған

Мухбиримиз әркин
2022.09.02
Share on WhatsApp
Share on WhatsApp

Хитай даирилири уйғур елидә йеңи типлиқ таҗсиман вирус юқуминиң пәсийишкә қарап маңғанлиқини елан қилиш билән бир вақитта, йеңи юқумдарларниң давамлиқ байқиливатқанлиқини билдүрмәктә. Хитай сәһийә тармақлириниң елан қилишичә, 1-сентәбир күни кечә саәт 12 гичә районда кесәллик аламити бар рәсмий юқумдарлардин 5 киши, кесәллик аламити йоқ юқумдарлардин 33 киши байқалған. Даириләр рәсмий юқумдарларниң һәммисиниң кесәллик аламити йоқлардин кесәллик аламити барларға өзгәргән юқумдарла икәнликини билдүргән.

“хитай хәвәрлири” ниң билдүрүшичә, уйғур аптоном районлуқ сәһийә комитети 1-сентәбир елан қилған учурида, кесәллик аламити бар юқумдарларниң һәммисиниң үрүмчидин байқалғанлиқи, кесәллик аламити йоқ юқумдарларниң 15 нәпириниң йәнила ғулҗа шәһиридин, қалғанлириниң үрүмчи, шиху, қутуби, җимисар, гучуң наһийәлиридин байқалғанлиқини ейтқан.

Уйғур елидә партлиған бу қетимқи юқумниң мәркизи ғулҗа шәһири болуп, һөкүмәт ғулҗида қаттиқ карантин тәдбирлирини йолға қойған. Райондин кәлгән учурлардин карантин тәдбирлириниң ғулҗидики қарияғач кәнтигә охшаш бәзи җайларда кишиләрниң ачлиқтин ‍өлүш вәқәлирини кәлтүрүп чиқарғанлиқи мәлум болған. Бу әһвал йәрлик аһалиләрдә карантин тәдбирлиригә болған ашкара наразилиқни пәйда қилған.

Мәлум болушичә, хитай б д т ниң уйғурлар һәққидики доклати елан қилинип, хитайниң уйғурларға қарита “инсанийәткә қарши җинайәт садир қилған болуши мүмкинлики” оттуриға қоюлған бир вақитта, бу хил наразилиқ вә тәнқидләргә қарита өзиниң карантин тәдбирлирини ақлаш тәшвиқатини күчәйткән. Йеқинқи бир-икки күндин бери хитай иҗтимаий алақә супилирида бәзи уйғурларниң карантин тәдбирлирини махтап сөзлигән видеолар пәйда болған. Райондики хитай сәһийә тармақлири 1-сентәбир күни елан қилған учурлирида, 31-авғуст күни кечә саәт 12 гичә райондики кесәллик аламити бар юқумдарларниң омуми саниниң 42 гә, кесәллик аламити йоқ юқумдарларниң омуми саниниң 1481 гә чүшкәнликини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.