31-Awghust küni Uyghur élide yene 38 neper yéngi tipliq tajsiman wirus yuqumdari bayqalghan

Muxbirimiz erkin
2022.09.02
Share on WhatsApp
Share on WhatsApp

Xitay da'iriliri Uyghur élide yéngi tipliq tajsiman wirus yuqumining pesiyishke qarap mangghanliqini élan qilish bilen bir waqitta, yéngi yuqumdarlarning dawamliq bayqiliwatqanliqini bildürmekte. Xitay sehiye tarmaqlirining élan qilishiche, 1-séntebir küni kéche sa'et 12 giche rayonda késellik alamiti bar resmiy yuqumdarlardin 5 kishi, késellik alamiti yoq yuqumdarlardin 33 kishi bayqalghan. Da'iriler resmiy yuqumdarlarning hemmisining késellik alamiti yoqlardin késellik alamiti barlargha özgergen yuqumdarla ikenlikini bildürgen.

“Xitay xewerliri” ning bildürüshiche, Uyghur aptonom rayonluq sehiye komitéti 1-séntebir élan qilghan uchurida, késellik alamiti bar yuqumdarlarning hemmisining ürümchidin bayqalghanliqi, késellik alamiti yoq yuqumdarlarning 15 nepirining yenila ghulja shehiridin, qalghanlirining ürümchi, shixu, qutubi, jimisar, guchung nahiyeliridin bayqalghanliqini éytqan.

Uyghur élide partlighan bu qétimqi yuqumning merkizi ghulja shehiri bolup, hökümet ghuljida qattiq karantin tedbirlirini yolgha qoyghan. Rayondin kelgen uchurlardin karantin tedbirlirining ghuljidiki qariyaghach kentige oxshash bezi jaylarda kishilerning achliqtin ‍ölüsh weqelirini keltürüp chiqarghanliqi melum bolghan. Bu ehwal yerlik ahalilerde karantin tedbirlirige bolghan ashkara naraziliqni peyda qilghan.

Melum bolushiche, xitay b d t ning Uyghurlar heqqidiki doklati élan qilinip, xitayning Uyghurlargha qarita “Insaniyetke qarshi jinayet sadir qilghan bolushi mümkinliki” otturigha qoyulghan bir waqitta, bu xil naraziliq we tenqidlerge qarita özining karantin tedbirlirini aqlash teshwiqatini kücheytken. Yéqinqi bir-ikki kündin béri xitay ijtima'iy alaqe supilirida bezi Uyghurlarning karantin tedbirlirini maxtap sözligen widé'olar peyda bolghan. Rayondiki xitay sehiye tarmaqliri 1-séntebir küni élan qilghan uchurlirida, 31-awghust küni kéche sa'et 12 giche rayondiki késellik alamiti bar yuqumdarlarning omumi sanining 42 ge, késellik alamiti yoq yuqumdarlarning omumi sanining 1481 ge chüshkenlikini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.